Алматының 10-шағын ауданында қару алып жүрген күдікті ер адам ұсталды, деп хабарлайды Astana TV.
Қалалық полицияның мәліметінше, оқиға 28 қазанда сағат 21:00 шамасында болған. Патрульдік полицияның «Буран-355» экипажы күдік тудырған ер адамды тексерген кезде, ол өзімен бірге қару бар екенін айтқан.
Оқиға орнына жедел-тергеу тобы шақырылды. Алдын ала мәлімет бойынша, тәркіленген зат - 9 мм калибрлі травматикалық қару болуы мүмкін.
Қазір қарудың шығу тегі мен сипаттамаларын анықтау үшін сараптама тағайындалды. Сондай-ақ оның өзге қылмыстарға қатысы бар-жоғы тексеріліп жатыр.
Аталған дерек бойынша Әуезов аудандық полиция басқармасы қылмыстық іс қозғады. Ұсталған азаматтың әрекетіне құқықтық баға беріледі.
