Негізгі / Жаңалықтар / Елімізде иммунды тапшылық вирусымен ауыратындар кері әсері көп дәрі-дәрмек қабылдаудан бас тартып отыр

Елімізде иммунды тапшылық вирусымен ауыратындар кері әсері көп дәрі-дәрмек қабылдаудан бас тартып отыр

Елімізде иммунды тапшылық вирусымен ауыратындар дабыл қақты. Олар кері әсері көп дәрі-дәрмек қабылдаудан бас тартып отыр. Ұзақ пайдаланған дәрінің тиімсіздігін дәрігерлер де айтып отыр. Ал Фармация комитетіндегілер даурықпауға шақырды. Тілшілеріміз мәселеге үңіліп, науқастар проблемасы қалай, қашан шешілетінін анықтап көрді.  

Олжас Нұржақып, тілші:

Бүгінде елде иммунды тапшылық вирусымен сырқанттанғандар саны 18 мыңды құрайды. Бұл диспансерлік тіркеуде тұрғандар саны. Оның 12 жарым мыңына антиретровирустық емдеу әдісі қолданылса, 800-ден астамы дәрі-дәрмектен бас тартқан. Себебі кері әсерінен қорқады. Солардың бірі - Любовь Чубукова. Алғаш аяғы ауыр кезінде емдеу әдісін қабылдаған. "Бала сау болып туылғанымен, дене бөлшектерім шаншып, жұмысқа зауқым төмендеді" дейді. 

Любовь Чубукова, Алматы қаласының тұрғыны:

Менің терапия қабылдап жүргеніме 10 жыл болды. Осы аралықта әртүрлі емдеу сатысынан өттім. Көпшілігі кері әсер етті. Тіпті қатты ауырғаным соншалық, ауырсынуды басатын дәрі қабылдадым. Күніне екі мәрте қабылдағанымнан болар.

Мамандардың айтуынша, әрбір дәрінің пайдасымен қатар зияны бар. Бірақ препарат дәріні ұзақ қабылдағандар ағзасымен күресе алмайтын көрінеді. Сондықтан дәрігерлер жыл сайын емдеу тізіміне өзгеріс енгізіп тұратындарын айтты.

Сайрангүл Қасымбекова, ЖИТС-тың алдын алу және онымен күрес жөніндегі республикалық орталықтың бөлім басшысы:

Бұрындары біз иммундық жасушалары тым төмен науқастарға ғана кешенді емдеу әдісін тағайындайтынбыз. 2018 жылдан бастап еліміздегі барлық науқасқа осы әдіс міндеттелді. Бірақ олардың өз қалауларымен. Сондықтан тағайындаған дәрі-дәрмектің кері әсерін беріп жататыны кездеседі. Жақпай қалған кезде олардың жүйесі өзгереді. Осы бағытта жыл сайын жаңа дәрілер сатып алынады. Осы жылы 3 дәріні қостық. 2019-шы жылы препараттар амбулаториялық тізімге енгізіліп, қолданыла бастайды.

Олжас Нұржақып, тілші:

Мәселе шешімін табу үшін жұқпалы аурумен ауыратын әйелдер қоғамдық қорының өкілі Наталья Минаева Денсаулық сақтау министрінің жеке блогына хат жолдаған. Ол тиімділігі жоқ дәрілерді қазір дамыған елдерде қолданып жүрген препараттарға ауыстыруды өтінген. Сабина, астаналық мамандар не дейді? Министрлік өкілдері қандай да бір жауап берді ме? 

Қоғамдық өкілдері ғана емес, елде жұқпалы аурулармен ауыратын адамдар одағының өкілдері де препараттардың кері әсері көп екенін, көбі оны қабылдай алмайтынын айтады. Сондықтан Денсаулық сақтау министрлігінен оны заманауи дәрілерге ауыстыруды сұрап отыр.

Елена Растокина, Қазақстандағы жұқпалы аурулармен ауыратын адамдар одағының өкілі:

Денсаулық сақтау министрлігінің  бізге  «Резоста», «Комплера», «Треумек» сынды препараттарды өзге елдер сынды шетелден  сатып алып беруін сұраймыз. Өйткені қазір қолданып жатқан дәрілерді  10 жылдан бері ішіп келеді. Алайда  олардың  дәл қазір науқастарға тигізер пайдасы аз болып тұр. 

Ал министрлік өкілдері биыл оларға жаңа препарат берілмейтінін айтады. Ол тек 2019 жылға жоспарланған. Ал қоғамдық қор өкілдері жылдан жылға ысырылған істің келер жылы да іске асатынына күмәнмен қарап келеді. Дегенмен Фармация комитетінің төрайымы тегін дәрілер тізіміне енгізілгенін айтты.

Светлана Бюрабекова, ҚР Денсаулық сақтау министрлігі фармация комитетінің төрайымы:

Бұған қатысты барлық мәселе жұмыс тәртібінде жүзеге асып жатыр. 2019 жылға сатып алынатын дәрі-дәрмектердің бірыңғай дистрибьюторлық тізімін тіркеуге әділет министрлігіне жолдадық. Келер жылдың  1 қаңтарынан бастап ВИЧ  инфекциясы бойынша тіркеуде тұрған барлық науқастарға жаңа препараттар беріле  бастайды.

Сабина Мәдиқызы, тілші: 

Ауру жұқтырған науқастар препаратты қабылдайтын кезде учаскелік дәрігердің бақылауында болады. Емді тағайындап, қандай дәрі қолданатынын да солар шешеді.