Чемпиондар
лигасында сынға түсіп жатқан «Астана» командасы тағы да бір ұпайды олжалады.
Топтық кезеңнің 5-ші турында Португалияның «Бенфика» клубын қабылдаған Станимир
Стойловтың шәкірттері 2-2 есебімен тең ойнады.
Топтық
кезең аясында «Астана» клубы өз алаңында ұтылып көрген жоқ. Бұған дейін
«Галатасарай» және «Атлетико» командаларымен ұпай бөліскен Станимир Стойловтың
шәкірттері бұл жолы Португалияның «Бенфика» клубын екі ұпайдан айырды. Бірінші
таймда қонақтардың қақпасына соғылған екі бірдей жылдам гол алаң иелерін
жеңіске жетелеген. Бірақ еурокубок жарыстарында тәжірбиесі мол Руи Виторияның
шәкірттері дер кезінде таразы басын теңестіріп кетті.
Үлесінде үш ұпайы бар
«Астана» командасы жарысты Еуропа лигасында жалғастыруға мүмкіндігі бар. Ол
үшін Станимир Стойлов шәкірттеріне 8-ші желтоқсан күні қонақта Түркияның
«Галатасарай» клубын жеңу қажет. Чемпиондар лигасындағы алғашқы маусым «Астана»
клубы үшін сәтті өтті. Қарт Құрлықтың азулы командаларымен тең дәрежеді өнер
көрсету «клубтың дамып, ал футболшылардың кәсіби тұрғыда өсуіне үлкен ықпал
етеді», дейді футбол мамандары.
Дмитрий
Огай, Қазақстан футболының ардагері:
Команданың
чемпиондар лигасында өнер көрсетуі болашаққа жол ашады. Мұндай ойындарға
қатысқан әр футболшы ысылып, тәжірбие жинайды. «Астана» клубы ел чемпионатында
мықты ұжым екенін қатарынан екінші жыл дәлелдеп берді. Ал чемпиондар
лигасындағы қазіргі ойыны көз қуантады. Байқасаңыз, астаналық клуб Еуропаның
мықты командаларын мойындата білді. Бұл үлкен жетістік.
Сондай-ақ,
топтық кезең аясында өткен басқа да ойындарға келсек. «А» тобында сынға түскен
Мадридтің «Реал» және «Францияның « Пари Сен Жермен» командалары келесі
айналымға жолдама алды. Рафаэль Бенитестің шәкірттері Украинаның «Шахтер» клубын
4-3 есебімен жеңсе, ал «Пари Сен Жермен» Швецияның «Мальме» футболшыларын 5-0 есебімен ойсырата
ұтты. «В» тобында «Манчестер Юнайтед» командасы күтпеген жерден Голландияның
«ПСВ» клубымен ұпай бөліссе, Мәскеудің «ЦСКА» командасы өз алаңында Германияның
«Вольфсбург» клубына жол беріп қойды. «Астана» командасымен бір топта өнер
көрсеткен Мадридтің «Атлетико» командасы Түркияның «Галатасарай» футболшыларын
2-0 есебімен ұтып, келесі айналымға шықты. Ал «Д» тобында алғашқы екі орынды
иеленген «Ювентус» және «Манчестер Сити» командалары бұл турда өзара жолықты.
Бұл бәсекеде жолы болған италиялық клуб 1-0 есебімен басым түсіп, 1-ші орынға
көтерілді.
Самат ҚАНАҒАТОВ
