Меккедегі қайғылы жағдай кезінде ажал құшқандар арасында қазақстандықтар
жоқ. Бұл туралы сыртқы істер министрлігінің баспасөз хатшысы Ануар Жайнақов
арнамызға хабарлады.
Ануар Жайнақов, ҚР СІМ баспасөз хатшысы:
Осы уақытқа келген ақпарат бойынша, Меккедегі қайғылы жағдайда
қазақстандықтар жоқ.
Сауд Арабиясының королі Салман ибн Абдул-Әзиз Әл Сауд, Қасиетті Мекке
қаласына жасалатын қажылықтың ереже-тәртіптерін қайта қарау туралы пәрмен
берді. Мұндай шешімге ол кешегі 717 адамның өліміне соқтырған қайғылы оқиғадан
кейін келген - деп жазады «Рейтерс». Король қажылық парызын орындаушылардың қозғалысын
жеңілдету мақсатында ұйымдастыру жұмыстарын пысықтау керектігін баса айтты.
Елдің Ішкі істер министрлігінің өкілі генерал Фейсал ат-Турки, Меккедегі
қайғылы оқиғаның бірден-бір себебін аптап ыстықпен байланыстырды. Айтуынша,
шайтанға тас ату рәсімі кезінде адамдар бір-бірін итерген, ауа-райының күрт
ысып кетуі құрбандар санының өсуіне алып келген. Еске салсақ, кеше Меккеде оқыс
жағдай орын алып, 700-ден астам адам қаза тапты. Тағы 800-ге жуығы зардап шеккен.
Ел билігі арнайы комиссия құрып, оқиғаның себеп салдарын анықтау үстінде. Айта
өтейік, бүгін Рим папапсы Франциск те барша мұсылман қауымына қайғырып, көңіл
айтты.
Салман ибн Абдул-Әзиз Әл Сауд, Сауд Арабиясының королі:
Қажылыққа келушілердің қауіпсіздігін қамтамасыз ету біздің құзырымызда. Қазір
тиесілі органдарға тапсырма беріп, тексеру жұмыстарын жүргізуді жүктедік. Оқиғаның
себеп-салдары жақын уақытта белгілі болады деген ойдамын. Қажылықтың ереже-тәртіптерін қайта қарау керектігі туралы да бұйрық бердім.
Жұрағат БАМАН
