$472.49 €515.44 ₽5.41
×

Ақтауда жоғалған цезий-137 салынған қобдишаны тапқан адамға 1,5 миллион теңге көлемінде сыйақы тағайындалды

AstanaTV
04.09.2014ж. 10:00
1531
Ақтауда жоғалған цезий-137 салынған қобдишаны тапқан адамға 1,5 миллион теңге көлемінде сыйақы тағайындалды

Жоғалған цезий-137 салынған қобдишаны тапқан адамға 1 жарым миллион тенге сыйақы тағайындалды. Бұл туралы радиоактивті контейнерді іздеу үшін жасақталған шұғыл штаб ресми хабарлама таратты.

Айта кетейік, қауіпті жүкті ақтөбелік фирма тасымалдаған. «Қазпромгеофизика» АҚ-ның бас директоры Марат Бижанов қазір Ақтау қаласында цезий-137-ні іздеумен айналысып жатыр. Ғаламторда жарияланған ақпаратқа сәйкес, «Қазпромгеофизика» АҚ Маңғыстау филиалы геология, геотехника, геохимия және мұнай өндіру саласында жобаны жасақтау бойынша қызмет көрсетеді. Сондай-ақ, компания геофизикалық түсірілімдер мен іздестурімен айналысады.

Еске салсақ, радиоактивті қауіпті зат тамыздың 27-сі жоғалды. Ол Оралдан Маңғыстау облысына бет алған КамАЗ көлігінен түсіп қалған деген болжам бар. Полиция пайымынша, ғылыми мақсатта Маңғыстауға жолданған цезий Сайөтпес-Шетпе жолында түсіп қалуы мүмкін. 50 келілік темір контейнердің із-түссіз жоғалып кетуі мүмкін емес.

Полиция өңір тұрғындарынан күдікті контейнер табылған жағдайда оны ашпауын өтініп отыр. Өйткені, Цезий-137 адамды сеспей қатыратын улы зат. Цезий сәулесі рентген терапиясы мен өлшеу құралдарында пайдаланылады. Сонымен қатар, бұл заттан бомба да жасауға болады екен.

Базаркүл ІЗІМОВА