Қазақстандық шаңғышы Алексей Полторанин жаңа
жылдағы алғашқы жеңісіне қол жеткізді. Италияда өткен әлем кубогында
отандасымыз 10 шақырымдық классикалық жарыста жеңімпаз атанды. Бұл жетістігінен
кейін Полторанин жалпы есепте 240 ұпай жинап, 12-сатыға көтерілді. Спорт
тақырыбын Самат Қанағатов тарқатады.
«Дакар» марафонының үшінші кезеңінде қайғылы
оқиға тіркелді. Мотокөліктер жарысына қатысқан Польша спортшысы Михал Херник
өмірден озды. 39 жасар спортшының денесі Сан Хуан және Чилесито елді
мекеніндегі арнайы учаскенің бірінен табылды. Поляк спортшысының ненің
салдарынан қаза тапқаны әзірге белгісіз. Қазір тексеру амалдары басталды.
Қайғылы оқиғаға қарамастан, жарыс жалғасын тапты. Жол талғамайтын көліктер
жарысында Қатар спортшысы Насер Аль-Атия тағы да үздік шықты. Жарыс барысында
«Мини» көлігін мінген ол өзінің басты қарсыластары Хоан Нани Рома мен Жинель де
Виллерстің алдын орап кетті. Бұл жетістігінен кейін Аль-Атия жалпы есептегі
басымдығын нығайтты. Қазақстанның насымысын қорғап жатқан Айдын Рахымбаевтың
экипажы бұл кезеңде сәтті өнер көрсетіп, жалпы есепте 9-орынға көтерілді.
Мотокөліктер жарысында Испания спопртшысы Хоан
Барреда Борт екінші кезең қатарынан жеңімпаз атанды. Қауіпті бұрылыстардан аман
өтіп, жазық жолда желмен жарысқан «Хонда» көлігінің иесі мәре сызығын бірінші
болып кесті. Жалпы есепте Борд өзін өкшелеп келе жатқан Марк Комадан 12 минутқа
ұзап кетті.
Елордалық «Барыс» командасы жаңа жылды жеңіспен
бастады. Құрлықтық хоккей лигасының кезекті турында Уфа қаласының «Салават
Юлаев» клубына қонаққа барған Андрей Назаровтың шәкірттері үш ұпайды олжалап
қайтты. Дегенмен, бұл ойындағы алғашқы шайбаны алаң иелері соқты. Голдың авторы
- Дмитрий Семин. Бірақ қуаныш ұзағынан болмады. Қарымта шабуылға шыққан
қазақстандық ұжым Роман Старченконың көмегімен есепті теңестірді. Бұл шайбадан
кейін шабыттанған «Барыс» командасы келесі сәтте есепті еселеді. Бұл жолы
Найджэл Доус мергендігімен танылды.
Екі шайбамен шектеліп қалмаған қазақстандық
хоккейшілер кездесудің соңғы минутында есепті ұлғайтты. Бұл сәтте алыстан мықты
соққы жасаған Кевин Даллмэн есепті қорытындылады. Келесі кездесуін «Барыс»
командасы енді өз айдынында Екатеринбург қаласының «Автомобилист» клубын
қабылдайды.
Самат ҚАНАҒАТОВ
