Австралияның Хобарте қаласында теннистен
халықаралық турнир басталды. Дәрежелі жарыста Қазақстанның намысын қорғап
жатқан Зарина Дияс екінші кезеңге жолдама алды. Алғашқы айналымда отандасымыз Испания спортшысы Сильвия
Солер Эспиносоны екі сетте ұтты.
«Дакар» марафонының 7-ші және 8-ші кезеңдері Чили мен Боливия мемлекеттерінде
жалғасын тапты. Бұл аралықта
командалар 155 шақырымдық жолды бағындырды. Дәрежелі жарыста Қазақстанның
намысын қорғап жатқан «Астана» командасының спортшылары бұл сыннан сүрінбей
өтті. «Мини» көлігін мінген Айдын Рахымбаевтың шәкірттері межелі жерге 14-ші
болып жетіп, жалпы есепте 13-орнын сақтап қалды.
«Тойота»
көлігін мінген Бауыржан Исабаевтың экипажы мәре сызығын 25-ші болып кесті.
Жарыс барысында біраз қарсыластарының алдын орап кеткен қазақстандық ұжым жалпы
есепте 18-орынға тұрақтады.
Ауыр жүк көліктер жарысында сынға түсіп жатқан
Артур Ардавичустың экипажы 7-ші кезеңде сәтті өнер көрсетіп, ұпай санын
түгендеді. Бірақ сегізінші кезең барысында көлігінен ақау шыққан қазақстандық
ұжым межелі жерге 10-шы болып жетті. Жалпы есепте қазақстандық команданың
капитаны 25-орынға жайғасты.
Австралияда футболдан Азия кубогы жолындағы жарыс
жалғасуда. «С» тобында сынға түсіп жатқан БАӘ командасы алғашқы жеңісіне қол жеткізді.
Бұл сында Махди Алидің шәкірттері ірі есеппен жеңіске жетті. Дегенмен ойындағы
алғашқы голды Қатар футболшылары соқты. Голдың авторы - Ибрахим. Бірақ қарымта
шабуылға шыққан БАӘ-нің аяқ доп шеберлері екі голмен жауап берді. Бұл сәттерде
шеберлігімен көзге түскен Халил дубльдің авторы атанды.
Қалған уақытта да алған бетінен қайтпаған Махди
Алидің шәкірттері қарсыластың қақпасына тағы екі гол соқты. Бұл сәттерде
мергендігімен танылған Мабхут командаластарының қошеметіне бөленді.
Самат
ҚАНАҒАТОВ
