Елордалық «Барыс» командасы қатарынан екінші ойында ұтылды. Бұған дейін
«Авангард» клубына есе жіберген Андрей Назаровтың шәкірттері Нижнекамск
қаласының «Нефтехимик» хоккейшілеріне 2-1 есебімен жол берді. Ойындағы алғашқы
голды қонақтар сапында Никита Щитов соқты. Қарымта шабуылға шыққан айдын иелері
Кевин Далмэннің көмегімен есепті теңестірді. Бірақ «Барыс» ойыншыларының
қуанышы көпке созылмады. Кездесудің аяқталуына санаулы секундтар қалғанда, мергендігімен танылған Игорь Полыгалов есепті еселеп, командасына жеңіс
сыйлады. Бұл сәтсіздігіне қарамастан, Назаровтың шәкірттері 78 ұпаймен турнир кестесіндегі 7-ші орнын сақтап
қалды. Келесі кездесуін «Барыс» командасы Челябі қаласының «Трактор» клубына
қарсы өткізеді.
Андрей
Назаров, «Барыс» клубының бас бапкері:
Қарсылас
команданың жеңісі заңды. Олар өздеріне берілген мүмкіндікті сәтті пайдаланды.
Біздің ойыншылар да аянып қалмады. Бірақ бізге сәттілік жолдас болмады. Екі
команда да плей-офф жолдамасы үшін таласып жатыр. Сондықтан алдағы кездесулер
өте маңызды. Бүгінгі ойындағы қателіктермен жұмыс істеп, нәтиже шығаруымыз
қажет.
«Astana Motorsports» жетекшісі Артур Ардавичус
келесі жылы өтетін жарысқа жаңа көлік мінетін болды. «Татра» командасымен үш
жылға келісілген шарт аяқталды. Қазіргі уақытта әлемнің үздік командалары
ұсыныспен шығып отыр. Қаржы мәселесі ақпан айының соңында белгілі болады.
Біздің арнамызға берген сұқбатында Артур Ардавичус: "Спортшылар жаңа келісімге
келуге дайын. Қазіргі басты мәселе - жарыстан шет қалмау",- деді.
Артур
Ардавичус, «Astana Motorsports» клубының жетекшісі:
Біз
ралли рейддегі жарысымызды жалғастыруымыз керек. Әлемдік аренада өзімізді жақсы таныта білдік.
Қанша қаржы бөлінетініне орай, алдағы
уақытта өз жоспарымызды анықтайтын боламыз.
Роджер
Федерер Австралия ашық чемпионатының жартылай финалына жолдама алды. Ширек
финалда швейцариялық Чехия спортшысы Томаш Бердыхтың алдын орап кетті. Алғашқы
сетте Бердых қарсылық көрсеткенімен, қалған уақытта ойын тізгінін қолына алған
Федерер келесі кезеңге сүрінбей өтті.
Әйелдер жарысының басты фавориті Серена
Уильямс бас жүлдеге тағы біртабан жақындады. Ширек финалда АҚШ спортшысы Ресей
теннисшісі Мария Шараповамен кортқа шықты. Бірінші сетте 6-4 есебімен алға
шыққан әлемнің бірінші ракеткасы үзілістен кейін де алған бетінен қайтпай, ұпай
санын арттырды. Өз кезегінде жиі қателескен Шарапова қарсыласының қарқынына
төтеп бере алмай, дәрежелі жарыспен қош айтысты. Шарапова мен Уильямс өзара 20
кездесу өткізіп, оның екеуінде ресейлік спортшы үздік шықса, қалған 18 ойында
АҚШ теннисшісінің мерейі үстем болды.
Самат ҚАНАҒАТОВ
