Алматыда
кәсіптік білім беру колледжіндегі әскери дайындық кабинетінен қару ұрлап шыққан
күдіктілер құрықталды. Бұл туралы Бостандық ауданы ІІБ мамандары хабарлады. Шамамен
осыдан бір ай бұрын, біреулер қаладағы колледждердің бірінде алғашқы әскери
сабаққа арнайы жасалған қару көшірмелерін түнгі уақытта ғимарат терезесінен
кіріп, сыртқа алып шыққан.
Бұл туралы полицияға оқу орнының директоры шағымданыпты.
Жедел іздестіру шаралараның нәтижесінде бұл қылмысқа сезікті ретінде 19 және 20
жастағы екі бозбала құрықталған. «Калашников» автоматты
қаруына ұқсас көшірмелердің құнын колледж ұжымы 220 мың теңгеге бағалап отыр.
Қазір
бұл оқиға бойынша қылмыстық іс қозғалып, тергеу алды шаралары басталды. Ал күдіктілерден
сот ешқайда кетпеу туралы қолхат алып, уақытша бостандыққа жіберген.
Құмарбек
Кеншібаев, Алматы қаласы Бостандық ауданы ІІБ
полиция бөлімі басшысының бірінші
орынбасары:
Кешенді
жедел-іздестіру жұмыстарының нәтижесінде криминалдық полиция бөлімі қызметкерлері
күдіктілердің ізіне түскен болатын. Бостандық ауданы аумағынан осы ұрлыққа күдікті
делінген екі азамат ұсталды. Олардан заттай айғақ ретінде қару көшірмелері тәркіленді.
Қазір тергеу жүріп жатыр.
Ришат Асқарбекұлы
