Бұған дейін қатарынан екі ойында ұтылған «Барыс» командасы маңызды екі ұпайға
қол жеткізді. Кезекті турда Челябі қаласының «Трактор» клубын қабылдаған Андрей
Назаровтың шәкірттері тек булит сериясында жеңіске жетті. Негізгі уақыт пен
овертаймда жеңімпаз анықталмағандықтан, командалар булит сериясында бақ сынады.
Бұл лотереяда жолы болған «Барыс» командасы 5-4 есебімен басым түсті. Бұл
жетістігінен кейін 80 ұпай жинаған Андрей Назаровтың шәкірттері турнир
кестесіндегі 7-ші орнын сақтап қалды.
Теннистен Австралия ашық чемпионатында сынға түсіп жатқан Серена Уильямс бас
жүлдеге тағы бір табан жақындады. Жартылай финалда Польша теннисшісі Агнешка
Радванскамен кортқа шыққан АҚШ спортшысы екі сетте жеңіске жетті. Бірінші сетте
қарсыласын 6-0 есебімен ойсырата ұтқан Уильямс үзілістен кейін де алған бетінен
қайтпай, финалға жолдама алды. Серена Уильямс «Үлкен Шлем» жарыстарының
21 дүркін жеңімпазы. Енді финалда АҚШ спортшысы Германия теннисшісі Анжелик
Керберді ұтатын болса, ол аты аңызға айналған Германия спортшысы Штеффи Графтың
рекордын қайталайды. Бұған дейін Уильямс пен Кербер өзара 6 кездесу өткізіп,
оның бесеуінде АҚШ теннисшісі үздік шықты.
Самат ҚАНАҒАТОВ
