Берлинде өткен «норманд төрттігі» елдері Сыртқы істер министрлерінің
кездесуінде Мәскеу мен Киев арасындағы қырғиқабақтық тағы да байқалып қалды.
Бұл ақпаратты «Рейтерс» Германия Сыртқы істер министрі Франк-Вальтер
Штайнмайерге сілтеме жасап таратуда.
Жиында тұтқындар алмасуды жалғастыру, сондай-ақ, Минскіде қол жеткізілген
келісім шарттардың толық орындалуын қамтамасыз ету мәселесі сөз болды. Ресей
Сыртқы істер министрі Сергей Лавров «Киев тарапынан Донбасқа экономикалық
тосқауыл жалғасуда. Бұл бізді алаңдатып отыр»,- деп мәлімдеді. Сонымен бірге министрлер-қақтығыс
аумағында ЕҚЫҰ өкілдерінің еркін жұмыс істеуіне мүмкіндік болу қажеттігін қадап
айтты.
Еске салайық, кеше кешкісін Берлинде-Германия, Ресей, Украина және Франция
Сыртқы істер министрлерінің қатысуымен келіссөздер басталды.
Франк-Вальтер Штайнмайер, Германия Сыртқы істер министрі:
Украинадағы дағдарыс жақын арада шешіледі деп айта алмаймын. Мәскеу мен
Киев арасындағы қарама-қайшылық әлі жалғасуда. Осы мәселелерді шешу үшін біраз
жұмыс атқару қажет. Украинадағы жағдайды тек келіссөздер арқылы қалпына
келтіруге болады. Бастысы, Минск келісімдері толық орындалуы қажет.
Самат ҚАНАҒАТОВ