Испанияның «Барселона»
командасы чемпиондар лигасының ақтық сынына шықты. «Бавария» клубымен болған
қарымта ойында 3-2 есебімен ұтылғанына қарамастан, екі кездесу қорытындысы
бойынша каталондық клуб финалға жолдама алды. Самат Қанағатов толықтырады.
"Альянс
Арена" стадионында өткен кездесуді ширақ бастаған "Бавария"
командасы бірінші кезеңнің басында есеп ашты. Әріптесінің бұрыштан көтерген
пасына биік секірген Мехди Бенатия баспен тура соққы жасап, командасын алға
шығарды. Бірақ қуаныш көпке созылмады. Қарымта шабуылға шыққан
"Барселона" футболшылары араға 8 минут салып есепті теңестірді.
Голдың авторы - Неймар.
Бұл голдан кейін шабыттанған каталондық клуб үзіліске
дейін есепті еселеді. Бұл жолы да Луис Суарестен пас алған Неймар мүлт кетпеді.
Екінші таймда есе қайтару үшін аянып қалмаған алаң иелері ұрымтал сәттің
біріндле таразы басын теңестірді. Бұл жолы Роберт Левандовский командаластарының
қошеметіне бөленді. Қалған уақытта Хосеп Гвардиоланың шәкірттері Томас Мюллердің
көмегімен алға шыққанымен, олардың одан артыққа шамалары келмеді. Екі кездесу
қорытындысы бойынша "Барселона" командасы 5-3 есебімен үздік шығып,
финалға жолдама алды. Каталондық клубтың қарсыласы "Реал" және
"Ювентус" командаларының арасындағы ойынан кейін белгілі болады.
Велоспорттан «Джиро де
Италия» веломарафоны жалғасуда. Кьявари және Специя қалаларының арасында өткен
4-ші кезеңде Италия спортшысы Давиде Формоло жеңіске жетті. 150 шақырымнан
тұратын таулы жолды Формоло 3 сағат 47 минут 59 секундта бағындырды.
Жеңімпаздан 22 секундқа қалып қойған "Орика Грин Эйж" клубының өкілі
австралиялық Саймон Кларк екінші орынды иеленсе, үшінші сатыны колумбиялық
Йонатан Монсальве еншіледі. «Астана» клубының спортшылары жарысты пелатонның
ішінде аяқтады. Жалпы есепте көшбасшы ауысты. 4 кезеңнен кейін «Орика Грин Эйж»
командасының спортшысы Саймон Кларк
жарыс лидерінің қызғылт жейдесін иеленді. Одан 10 секундқа қалып тұрған
командаласы Эстебан Чавес екінші сатыға көтерілсе, үшінші орын чехиялық Роман
Кройцегерге бұйырды. «Астана» командасының капитаны Фабио Ару жалпы есепте 5-ші орынға тұрақтады.
4 кезеңнен кейін италиялық көшбасшыға небәрі 23 секунд ұтылып келеді.
Самат ҚАНАҒАТОВ
