Үндістанда
аптап ыстық салдарынан қаза тапқандардың саны 1100 адамнан асты. Елдің кей
аумақтарында ауа температурасы +50-градусқа жақындаған, - деп хабарлайды
Би-Би-Си. Қаза болғандардың басым бөлігі Телангана, Андхра-Прадеш оңтүстік
штаттарының тұрғындары. Сондай-ақ, Раджастхан, Батыс Бенгалия және Одиша
штаттарында елуден астам адам көз жұмды. Андхра-Прадеш штатының билігі жедел
көмек көрсету бекеттерін ашқан. Мұнда аптаптан қиналған тұрғындарға ауыз су мен
сүт беріледі. Синоптиктер таяу күндері кей аудандарда температура аздап
төмендейді деген болжам жасап отыр. Үндістан билігі болса, азаматтарды абай
болуға, мүмкіндігінше, үй-жайларынан сыртқа шықпауға кеңес берді. Айта кетейік, Үндістанда өткен аптадан бері
аптап ыстық болып тұр. Елдегі Метеорология департаменті өткен дүйсенбіні ең
ыстық күн ретінде тіркеген. Бұл күні мемлекет астанасы Нью-Делиде температура
+46,4 градусқа жетті.
Базаргүл
ОТЫНШИЕВА
