Қазір Алматыда шетелдік рейспен келген жолаушыларды коронвирус індетіне тексеру үшін санитар-мамандар саны арттырылған. Ал турфирмаларға әзірге ауру тараған елдерге жолдама бермеу ескертілген. Дегенмен дәрігерлер коронавирус жұқтырған науқастарды емдей аламыз деп отыр.
Тілеухан ӘБІЛДАЕВ, АЛМАТЫ Қ. ҚОҒАМДЫҚ ДЕНСАУЛЫҚ БАСҚАРМАСЫНЫҢ БАСШЫСЫ:
Жұқпалы аурулардың басқасында да пайдаланып жүрген вирусқа қарсы дәрі-дәрмектер оған тиімді деп есептеледі. Қазір де оның тиімділігі дәлелденген.
Қытайдан төнген қауіпті дерттің алдын алу үшін бюджеттен 3,5 млрд теңге бөлінбек. Бұл қаражатқа қажетті дәрі-дәрмек, бетперде және науқастың қызуын тексеретін құрылғылар алынады. Қомақты қаражаттың тиісті деңгейде жұмсалуын Денсаулық сақтау министірлігі қадағалайды. Дегенмен коронавирус екі ел арасындағы сауда-саттыққа кері әсер етпейтін сияқты. Қытайдан келіп-кететін тауарларға қазақ Үкіметі әзірге шектеу қоймайтынын айтып отыр.
Әлихан СМАЙЫЛОВ, ҚР ПРЕМЬЕР-МИНИСТРІНІҢ БІРІНШІ ОРЫНБАСАРЫ, ҚР ҚАРЖЫ МИНИСТІРІ:
Бүгінгі таңда Қытай шекарасында тауарлардың кіріп-шығуына шектеу қою жоспарланған жоқ. Дегенмен туристік салада шектеу бар. Біз ел азаматтарының Қытайға баруын кейінге шегеруі өтіндік. Бұл қауіпті вирустан сақтанудың бірден-бір жолы.
Д. Мұхаммедкәрім
