Астана қалалық жұмыспен қамту
бөлімі жыл басынан бері бір жарым мыңнан астам адамға жұмыс тауып берді.
Мекеменің базасында тағы үш жарым мың бос орын бар. Сылақшы-әктеушілер,
әрлеушілер, тас қалаушылар мен D санатындағы жүргізушілер жоғары сұранысқа ие.
Елорданың
әлеуметтік нысандарын аралаған шаһар басшысына орталық мамандары осындай
мәліметтер келтірді. Әділбек Жақсыбеков Астанадағы дағдарыс орталығына да бас
сұқты. Мұнда тұрмыстық зорлық-зомбылық көрген әйелдерге қолдау көрсетіледі.
Әкім қарттар мен мүгедектерге арналған медициналық-әлеуметтік орталықта да
болды. Бұл жерде 25 пен 102 жас аралығындағы 300-ге жуық адам пана тапқан.
Орталық тұрғындарының көпшілігі спортқа әуес. Тіпті араларында үстел теннисі
мен тоғызқұмалақтан ел чемпиондары да бар.
Айгүл ӘДЕПБАЙ
