Ал, белгісіз елесті қуып аяғынан әбден таусылған оралдық полиция енді, иесіз қалған көліктерді күзете бастағанға ұқсайды. Мәселе, Орал-Атырау күре жолы бойында тұрып қалған жүк көлігінде. Келтірілген деректерге қарағанда, көліктің қозғалысын полицияның өзі тежеген сияқты. Тәртіп сақшылары тоқтатқанда, "Кілтімді жоғалтып алдым", деп көлік жүргізушісі үйіне кеткен. Кейіннен, артына тиелген етті басқа көлікке тиеп алып кетіпті. Содан бері екі ай өтті. Ал, иесіз қалған "фураны" содан бері полицияның өзі күзетіп жүр. Бір қызығы көлік иесінің кім екенін сақшылар біледі. Оның тағы бір жүк көлігі айып тұрағында тұрған көрінеді. Полицияның хабарласқанынан нәтиже жоқ. Өйткені иесі, телефон тұтқасын көтермей жүр. Басы қатқан батыс полициясы енді, не істерін білмей дал болып жүр.
Болатбек БЕЛГІБЕКОВ, БҚО ПОЛИЦИЯ ДЕПАРТАМЕНТІНІҢ РЕСМИ ӨКІЛІ:
Жүргізуші із-түзсіз, хабарсыз кетті, жоқ. Облыстық полиция батальоны командирінің соққан қоңырауларына жауап бермейді. Айыптұраққа апаруға үлкен жүк көлігі, бізде ондай мүмкіндік әзірге жоқ. Әсіресе тәуліктің қараңғы уақытында бұл автокөлік жол қозғалысының басқа да қатысушыларына өз кедергісін жасауда. Сол үшін де патрульдік автокөлік сол жүк көлігінің маңында, айналасында жүруге мәжбүр болып отыр.
Е. Карин
