Қазақстандағы әрбір бесінші мектепте санитарлық талаптар сақтамайды. Бұл туралы Үкімет отырысында премьер-министрдің орынбасары айтты. Сондай-ақ кейбір өңірлерде халықты вакциналау тәртібі орындалмауда. Ералы Тоғжанов жауаптыларға соңғы ескерту жасады. Егер, осыдан кейін оң динамика болмаса әкімдердің орынбасарларына қатаң шара қабылдамақ.
Ералы ТОҒЖАНОВ, ҚР ПРЕМЬЕР-МИНИСТРІНІҢ ОРЫНБАСАРЫ:
1 қыркүйектен бері вакциналау жоспарының ең төменгі қарқыны Нұр-Сұлтан қаласы мен Маңғыстау, Қостанай облыстарында байқалып отыр. Міндеттеме 10-13 пайыз шамасында ғана орындалған. Ведомствоаралық комиссия отырыстарында өңірлерге вакциналау қарқынын жеделдету туралы бірнеше мәрте тапсырма берілген болатын. Бірақ ол тапсырма қажетті деңгейде орындалып жатқан жоқ.
Елде вакцина алу керек тұрғындардың саны қайта қаралып 11 жарым миллион адам деп бекітілді. Денсаулық сақтау министрлігінің бүгінгі мәліметі бойынша қазақстандықтардың 71 пайызы екпе салдырған. Сырқаттанушылар қатары да азайды. Өткен екі аптамен салыстырғанда аурушаңдық 17% - ға төмендеді. Жүзден астам жұқпалы аурулар ауруханасы жабылған. Содан болар, ертеңнен бастап карантин талаптары жеңілдейді.
Алексей ЦОЙ, ҚР ДЕНСАУЛЫҚ САҚТАУ МИНИСТРІ:
Сауықтыру, оңалту орталықтарына баратын емделушілер вакцина паспортымен немесе індеттің жоқтығын растайтын құжаты болуы керек. ПТР сынамасы мекемеге барардан 3 күн алдын тапсырылады. "ASHYQ" жобасына қатысатын бизнес объектілерінің де жұмыс уақыты ұзартылады.
А. Данияр
