6 адам опат болған Абай шахтасындағы апатқа кінәлілер әлі анықталған жоқ. Кен орнында арнайы құрылған үкіметтік комиссия жұмыс істеп жатыр. Сондай-ақ шахтаны улы метан газынан тазарту шаралары жүруде. Төтенше жағдайға кім кінәлі? Аса қауіпті кен орнында өндірістік қауіпсіздік қалай сақталады? Тілшіміз Айжан Қуаштың репортажы.
Кен орнында жұмыс тоқтап тұр. Бірақ кешегі апаттың ізі де байқалмайды. Оқиғаның қалай болғанын, тек төтенше жағдай министрлігі ғана баяндады. 500 метр тереңдікте 64 кенші болған. Кенет метан газы тарап, көмір қыртыстары құлай бастаған. Апат ошағында 6 жұмысшы тұншығып қалған.
Юрий ИЛЬИН, ҚР ТӨТЕНШЕ ЖАҒДАЙ МИНИСТРІ:
Кенет тараған метан көрсеткіші 40 пайыздан асқан. Датчик оны сезіп, дереу жарық өшкен. Осылай жарылыстың, өрттің алдын алған. Алайда 6 шахтер улы газға бірден тұншыққандықтан олар қорғаныш құралын киіп те үлгермеген.
Кіре берістегі 2- кенші қорғаныш құралдарын киіп үлгерген. Қалған жұмысшылар апат орнынан алыс жүргендіктен өз күштерімен жер бетіне шыққан. Қазір "тау-кен және құрылыс жұмыстарын жүргізу кезінде қауіпсіздік қағидаларын бұзу" бабымен тергеу басталды.
Санжар ӘДІЛОВ, ҚР ІІМ ТЕРГЕУ ДЕПАРТАМЕНТІНІҢ БАСТЫҒЫ:
Қылмыстық іс бойынша бірқатар сот сараптамалары тағайындалды. Тергеу мен сараптама қорытындысы шыққан соң күдікті тұлғаларды анықтаймыз. Олар 8 жылға сотталуы мүмкін.
Қазіргі таңда апат ошағын метан газынан тазарту жұмыстары жүріп жатыр. Мамандар қауіпсіздік ережелері қаншалықты сақталғанын анықтамақшы. Ал Арселор Миттал Теміртау компаниясының бас директоры болса, БАҚ өкілдеріне өндірістік қауіпсіздікті сақтау шараларына бұрынғыдан үш есе көп қаражат жұмсағанын айтып ақталды.
Биджу НАИР, «АРСЕЛОР МИТТАЛ ТЕМІРТАУ» АҚ БАС ДИРЕКТОРЫ:
Біз үшін де мұндай жағдайды болдырмау, қауіпсіздікті сақтау бірінші орында. Жапа шеккендердің отбасыларына келісімшартқа сәйкес 10 жылдық жалақы төлейміз. Онымен бірге әр отбасынынң үй мәселесі болса, балаларының оқуы, несиелерін өтеу, жерлеу рәсімдерін мойнымызға аламыз. Психологиялық- материалдық көмек көрсетеміз.
Компанияның бұл көмегі жақындарынан айырылған жандардың жанын жылытпасы анық. Марат Шарипов 31 жастағы жиені Наиль Абдуллиннен айырылды.
Марат ШАРИПОВ, МАРҚҰМ Н.АБДУЛЛИННІҢ НАҒАШЫСЫ:
Жап- жас, қайрат жігері бар шақта кетіп қалды. Менің әкем, мен, жиенім бәріміз шахтермыз. Талай жолдастарым кетті, осылай. Ешкімді кінәлағым келмейді. Обалы нженерлік- техникалық қызметкерлердің мойнында.
Айжан ҚУАШ, ТІЛШІ:
Абай шахтасы Қарағанды облысындағы аса қауіпті кен орындарының бірі. 2008 жылы дәл осы шахтада метан газы атылып 30 кенші қаза тапқан болатын. Содан бері шахтаны жабу мәселесі қанша көтерілгенімен оның жұмысы тоқтамай келеді. Өткен мамыр айында ғана сот көмір қазуды тоқтату жайында шешім шығарған болатын. Алайда кезекті тексеруден кейін оның жұмысы қайта жанданды.
Қазір Күзембаев, Саран шахталарын да жабу мәселесі сотта қаралып жатыр. Жансақтау бөлімінде жатқан екі кеншінің беті бері қарап, бүгін палатаға ауыстырылды. Қайғы жамылған алты отбасы, ертең жақындарын ақтық сапарға шығарып салуға дайындықты бастап кеткен.
А. Қуаш
