Қазақстанда соңғы тәулікте 9 мың 122 адамнан коронавирус індеті ПТР сынамасы арқылы анықталған. Бұл алдыңғы күнмен салыстырғанда екі есе көп. Статистикаға сәйкес, ең қиын кезеңде яғни 2020 жылдың шілдесінде күніне 8 мыңнан астам адам ауру жұқтырған болатын. Осыны ескерсек, Қазақстанда «ковид» жаңа антирекорд орнатты. Ауру жұқтырғандардың басым бөлігі Елордада – 5 мың адамнан асады. Одан кейін Алматы, үштікті Қарағанды облысы жалғайды. Індет анықталған аймақтар тізімде Солтүстік Қазақстан облысы соңында тұр. Мұнда 59 адамнан коронавирус расталыпты. Сондай-ақ, "омикрон" штаммы Алматы мен Нұр-Сұлтан қалаларында тіркелген. Ал, Дүниежүзі денсаулық ұйымы әлемде күніне 15 миллионнан астам адам, жаңа штамды жұқтырғанын хабарлайды. Бұл денсаулық сақтау ұйымы үшін де рекорд болып отыр. Дәлірек айтсақ, өткен тәулікте әлемде коронавирустың 15 миллионнан астам жаңа жағдайы тіркеліп, 43 мың 500-ге жуық науқас қайтыс болды. Сарапшылар әлемде сырқаттану дерегінің бірден өсуін "омикрон" штамының тез таралуымен түсіндіреді.
А. Данияр
