«AMANAT» фракциясы 7 жылдық президенттік мерзімді енгізу бастамасын қолдайды. Бұл туралы партия төрағасы Ерлан Қошанов фракция жиынында айтты. Төраға бұл реформалардың прогрессивті екенін және әділетті Қазақстан құру бағытына толық сәйкес келетінін атап өтті. Ерлан Қошанов Мемлекет басшысы Конституциялық Кеңестің қарауына ұсынған 7 жылдық мерзімді енгізу және елорданың атын өзгерту жөніндегі мәселелер Мәжілістегі барлық фракция депутаттарының ұсынысы екеніне назар аударды.
Ерлан ҚОШАНОВ, «AMANAT» ПАРТИЯСЫНЫҢ ТӨРАҒАСЫ:
Президент мандатын 7 жылдық бір мерзіммен шектеу – прогрессивті әрі қажетті норма. Бұл биліктің бір қолға шоғырлануына тосқауыл болып, суперпрезиденттік басқару жүйесінен түбегейлі арылуға жол ашады. Аталған мәселе ел арасында жан-жақты талқылануда. Біз осы сайлау жүйесін биылдан бастап енгізуді қолдаймыз.
Ерлан Қошанов елорданың атауын өзгертуге қатысты да пікір білдірді. Бұл ұсыныс Тұңғыш Президенттің қазіргі Қазақстанның құрылу жолындағы еңбегін жоққа шығармайтынын айтып, қоғамның да пікірі ескерілгенін атап өтті.
А. Задабек
