Шанхай ынтымақтастық ұйымын жаһандық экономикалық платформаға айналдыруымыз керек. Самарқандта өтіп жатқан саммитке қатысқан Мемлекет басшысы Қасым-Жомарт Тоқаев осылай деді. Экономикалық ынтымақтастықтың басым бағыттары саналатын транзиттік-көлік секторы, азық-түлік және энергетикалық қауіпсіздік мәселелеріне арнайы тоқталды. Тілшіміз тарқатады.
Президент Қасым-Жомарт Тоқаев Шанхай ынтымақтастық ұйымына мүше мемлекеттер басшылары кеңесінің Саммитіне қатысуға барды. Конгресс орталығында Өзбекстан Президенті Шавкат Мирзиеев құрметпен қарсы алды.
Шағын құрамдағы кездесу алдында халықаралық әріптестерімен әңгімелесті, сегіздіктің басшылары естелік үшін фото суретке түсті.
Негізгі мәселелер кеңейтілген құрамда талқыланды. Шанхай ынтымақтастық ұйымына мүше мемлекеттердің үлесі әлемдік жалпы ішкі өнімнің шамамен төрттен бірін құрайды. Яғни 23 триллион доллардан асады. Президент ұйымның әлеуетін ұтымды пайдалану керек деді.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Ұйым ең табысты бірлестікке айналды. Сондықтан географиясы жылдан жылға кеңейіп келеді. Біз тауарлардың, капиталдың, көрсетілетін қызметтер мен технологиялардың еркін айналымына кезең-кезеңмен көшу үшін ШЫҰ-дағы экономикалық ынтымақтастықты түрлі формада дамытуды қолдаймыз.
«Қытай – Еуропа» және Транскаспий халықаралық көлік бағыты бойынша теміржол тасымалы, сондай-ақ Қазақстан мен Қытай шекарасында үшінші теміржол өткелінің құрылысын салу жоспары ұйым жұмысының жетістігі. Шығыс Азиядан Парсы шығанағы елдеріне ең қысқа жол саналатын «Қазақстан-Түрікменстан-Иран» темір жолының да әлеуеті зор.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Біз Орталық және Оңтүстік Азия арасындағы көлік бағыттарын кеңейту, «Солтүстік-Оңтүстік» және «Шығыс-Батыс» трансеуразиялық дәліздерін дамыту жөніндегі іс-әрекеттерді қолдаймыз. Жалпы, жаңа мультимодальды көлік дәліздері мен логистикалық орталықтар ашуды және қолданыстағыларын жаңғыртуды құптаймыз.
Мемлекет басшысы Қасым-Жомарт Тоқаев азық-түлік және энергетикалық қауіпсіздік мәселелеріне ерекше тоқталды. Өйткені, ұйымға мүшелік ететіндер - әлемдегі ең ірі ауыл шаруашылығы өнімдерін өндіруші әрі экспорттаушы елдер.
Қасым-Жомарт ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Біз ШЫҰ аймағында да, одан тыс жерлерде де ауыл шаруашылығы өнімдерінің саудасын кеңейтуді ынталандыруымыз керек. Мемлекеттеріміздің халықаралық азық-түлік өндірісі мен жеткізу тізбегінің үздіксіз жұмыс істеуін қамтамасыз етуге қатысуы әлемдік азық-түлік нарығындағы тұрақтылықты сақтауға көмектеседі. Біз сондай-ақ, Жаңартылатын энергия көздері саласындағы ынтымақтастық бағдарламасын қабылдауды өзекті деп санаймыз.
Ұйымның жарғылық құжатында үш зұлымдылыққа қарсы күресеміз деп бекітілген. Сондықтан Президент қорғаныс ведомстволары мен арнайы қызметтері арасында әскери-саяси ынтымақтастықты арттыруды ұсынды.
Т. Әлжанов
