Білім
беру нысандары мерзімінде тапсырылуы тиіс. Бүгін премьер-министрдің орынбасары
Дариға Назарбаева әкімдіктерге осындай тапсырма берді. Бұл туралы
премьер-министр сайтында жарияланды. Биыл Ұлттық қордан 77 мектеп пен 19
балабақша салуға 57 миллиард теңге бөлінген.
Қазір
96 нысанда құрылыс жүріп жатыр. Білім және ғылым вице-министрінің ақпарынша, 21
нысан пайдалануға берілген. Оның 13-і мектеп, қалғаны балабақша. Бөлінген
қаражаттың 88 пайызы жұмсалған. 5 аймақта - Алматы, Шығыс Қазақстан,
Қарағанды және Оңтүстік Қазақстан облыстары мен Астанада - 3,2 миллиард теңге
игерілмеген. Бұған мердігерлермен болған сот ісі және келісімшарттарды кеш
орындау мәселелері себеп болса керек. Вице-премьер құрылысты бақылауға алып,
ақшаны мерзімінде игеруді де тапсырды.
