Сенат депутаттары Халықаралық қатынастар, қорғаныс және қауіпсіздік комитетінің кеңейтілген отырысында «Қазақстан Республикасының Үкіметі мен Қырғыз Республикасының Үкіметі арасындағы шекаралық өкілдердің қызмет учаскелері туралы хаттаманы (карта 1:200 000) ратификациялау туралы» заңды талқылады.
Хаттамада екі елдің шекара өкілдері өз міндеттерін бір-бірімен ынтымақтастықта атқаратын мемлекеттік шекара учаскелерінің аумақтық шекараларын анықтау ұсынылып отыр.
Хаттаманы ратификациялау екі ел арасында тату көршілік қатынастарды қолдауға, өзара тиімді экономикалық және өзге де ынтымақтастықты дамытуға, адам құқықтары мен бостандықтарын қамтамасыз етуге, әрбір қатысушы мемлекеттің мүдделерін қорғауға бағытталған келісілген шекара саясатын жүргізуге мүмкіндік береді.
Заң Қазақстан мен Қырғызстанның мемлекеттік шекарасында өзара құрмет, сенім және тең құқықтылық рухында тұрақтылықты одан әрі қамтамасыз етуге ықпал ететін болады.
Комитет мүшелері талқылау қорытындысы бойынша заңды Палата отырысында қарауға жіберу туралы шешім қабылдады.
