Билік
өкілеттілігін қайта бөлу жөніндегі жұмыс тобының алғашқы отырысы өтті. Мұны
Ақорда сайты хабарлады. Жиында билікті бөлудегі отандық және шетелдік тәжірибе
қаралып, конституция мен заңнамаларға
талдау жасалған. Президент әкімшілігі жетекшісі Әділбек Жақсыбеков бастаған
жұмыс тобының құрамында оның орынбасары, Жоғарғы сот пен Конституциялық кеңес
төрағалары, Бас прокурор, Әділет министрі бар. Сенат пен Мәжіліс төрағаларының
орынбасарлары, сондай-ақ заң университетінің ректорлары мен директорлары енген.
"Қазақстан заңгерлер одағы" қоғамдық бірлестігі мен Президент
жанындағы мемлекеттік басқару академиясының өкілдері де бар. Айта кетейік,
билік өкілеттілігін бөлу туралы бастаманы Президент көтеріп, Парламент пен Үкіметтің де жауапкершілік алатын кезі келді деген еді.
