Мәжілісте Астана мен республикалық маңызы бар қалаларды дамыту туралы заң жобасы таныстырылды. Қазір қаланың сәулеттік келбетіне тек сыртқы жарнама емес, сондай-ақ маңдайшалар мен нұсқаулықтардың ретсіз орналастырылуы зиян тигізуде. Ұлттық Экономика вице-министрі Бауыржан Омарбековтың айтуынша, жаңа құжат арқылы 1 кодекс пен 6 заңға түзету енгізіледі. Заң жобасы жер қатынастары, құрылыс, жарнама, экология және басқа да салалардағы мәселелерді шешуге бағытталған.
БАУЫРЖАН ОМАРБЕКОВ, ҚР ҰЛТТЫҚ ЭКОНОМИКА ВИЦЕ-МИНИСТРІ:
Сыртқы жарнамаларды жолдар мен көшелерді бояу арқылы орналастыру, яғни мынау асфальттың бетіне орналастырылған жарнамалар да қаланың келбетіне өзінің эстетикалық теріс әсерін тигізіп отыр. Сондай-ақ, қаланың келбеті нашарлауына қоғамдық орындардағы аудио жарнаманың кең таралуы да себеп болып отыр.
Вице-министрдің мәліметінше, бұл әрекеттер заң бұзушылыққа жатпайды. Заңнамада ешқандай әкімшілік шара көрілмеген. Сондықтан қаланың бұл мәселелерін шешу үшін заңнамалық өзгерістер ұсынылды. Жаңа құжатта аталған мәселелерге тыйым салу қарастырылған.
