Дональд Трамп минерал импортының АҚШ ұлттық қауіпсіздігіне әсерін бағалауды тапсырды. Жарлықта Қытайға салынатын баж салығы 245 пайызға дейін көтерілуі мүмкін екені айтылған. Бұл туралы Stan.kz ақпарат агенттігі Ақ үйдің ресми сайтына сілтеме жасап хабарлайды.
АҚШ президенті Дональд Трамп өңделген маңызды минералдар мен олардың өнімдерінің импорты АҚШ ұлттық қауіпсіздігіне қалай әсер ететінін тексеруді бастау туралы жарлыққа қол қойды. Құжат Ақ үйдің ресми сайтында жарияланды.
"Америка Құрама Штаттарының импортқа тәуелділігі және жеткізу тізбегіміздің әлсіздігі ұлттық қауіпсіздікке, қорғаныс дайындығына, баға тұрақтылығына, экономикалық өркендеуге және тұрақтылыққа ықтимал қауіпті арттырады.
Шетелдік өндірушілер АҚШ-қа геосаяси және экономикалық ықпал ету құралы ретінде жеткізу тізбегіндегі үстемдігін пайдаланып, бағаны манипуляциялаумен айналысады және экспортты ерікті түрде шектейді", - делінген жарлықта.
Мысал ретінде Қытай келтірілген. Бұл ел бірнеше ай бұрын АҚШ-қа галий, германий, сүрме және басқа да әскери мақсаттағы негізгі жоғары технологиялық материалдарды экспорттауға тыйым салған.
"Осы аптаның өзінде Қытай бүкіл әлемдегі автомобиль өндірушілері, аэроғарыш техникаларын өндірушілер, жартылай өткізгіштер өндіруші компаниялар мен әскери мердігерлер үшін маңызды компоненттерді жеткізуді тоқтату үшін алты ауыр сирек жер металының, сондай-ақ сирек жер магниттерінің экспортын тоқтатты", - делінген жарлықта.
Бұдан бөлек жарлықта Дональд Трамптың барлық елге 10 пайыздық баж салығын және Американың ұлттық қауіпсіздігін қорғау және мүмкіндігін теңестіру үшін АҚШ-пен едәуір сауда тапшылығы бар елдерге жеке жоғары тарифтер енгізген күні аталып өткен.
"Қазірдің өзінде 75-тен астам ел жаңа сауда келісімдерін талқылау туралы ұсыныс білдірді. Нәтижесінде, жауап шараларын қабылдаған Қытайды санамағанда, осы талқылаулар аясында қазір жеке жоғары тарифтерді енгізу уақытша тоқтатылды.
Жауап әрекеттерінің салдарынан Қытайға АҚШ-қа тауар импорттау үшін 245%-ға дейінгі мөлшерде баж салығы салынуы мүмкін", - делінген құжатта.
Ақ үй хабарлауынша, президент Трамп болатқа қатысты нақты 25 пайыздық тарифті қалпына келтіру және алюминийге тарифті 25 пайызға дейін көтеру үшін бұрынғы олқылықтар мен жеңілдіктерді жабу туралы прокламацияларға қол қойған.
Еске салайық, 2 сәуірде Трамп 185 елге баж салығын енгізетінін мәлімдеген еді. АҚШ баж салығын салған елдердің тізімінде Қазақстан да бар.
