Қазақстанда мемлекеттік рәміздерді пайдалану ережелері өзгереді. Таяу арада Үкімет осы мәселеге қатысты арнайы қаулыға нақты түзетулер енгізбек. Елордада өткен Мемлекеттік ту көтеру рәсімінде Президент Қасым-Жомарт Тоқаев ұлттық нышандардың мәртебесін заң жүзінде бекемдей түсетін осындай маңызды шешімді жариялады. Салтанатты шараның тағы бір басты жаңалығы - отандық әскери жүйеде тұңғыш рет жаңа дәстүр қалыптасып, озат бітірушілерге бірден жоғарылатылған шен табысталды.
Мемлекеттік рәміздер - кез келген елдің ішкі бірлігі мен саяси тұрақтылығының басты барометрі. Әсіресе, жаһандық идеологиялар тартысқа түскен алмағайып заманда ұлттық бірегейлікті сақтап қалу - мемлекет қауіпсіздігінің тікелей кепілі. Бүгін Мемлекет басшысы Қасым-Жомарт Тоқаев «Атамекен» этномемориалды кешенінде дәл осы идеяның маңызына тоқталып, елдіктің басты нышандарын ұлықтау рәсіміне қатысты.
Реформадан кейін жаңа құқықтық кеңістікте заң мен тәртіп бірінші орынға шықты. Ата заңда бекітілген құндылықтар енді тек қағазда қалмай, күнделікті өмірдің нормасына айналуы тиіс. Осы ретте, мемлекеттік белгілердің қоғамдағы мәртебесін ресми деңгейде бекіту үшін атқарушы билікке нақты міндеттер жүктелмек.
ҚАСЫМ-ЖОМАРТ ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Ұлт рәміздерінің мәртебесін арттыру, бұл – аса маңызды мемлекеттік жұмыс. Таяу арада Үкімет мемлекеттік рәміздерді орынды пайдалану мәселесі бойынша қаулыға қажетті түзетулерді енгізеді. Ұлттық нышандарымызды ұлықтау – ортақ парыз, бұл – әр азаматтың міндеті. Түптеп келгенде, рәміздерді қастерлеу – мемлекетімізді құрметтеу деген сөз.
Салтанатты шараның тағы бір маңызды акценті - ел қорғандарына көрсетілген ерекше қолдау болды. Президенттің тікелей шешімімен отандық әскери институттардың озат бітірушілеріне мансаптық баспалдақты бір қадам алға аттап, бірден жоғары мәртебе алу мүмкіндігі берілді. Бұл - жас офицерлер корпусына мемлекет тарапынан жасалған үлкен аванс әрі кәсіби жауапкершілік.
ҚАСЫМ-ЖОМАРТ ТОҚАЕВ, ҚАЗАҚСТАН РЕСПУБЛИКАСЫНЫҢ ПРЕЗИДЕНТІ:
Сіздер оқуды бітіріп, бірден «аға лейтенант» шенін алатын тұңғыш түлек боласыздар. Бұл – өздеріңізге артылған зор сенім және үлкен жауапкершілік. Нағыз сарбаздың абырой-беделі оның шенімен емес, ең алдымен, Отан алдындағы мінсіз қызметіне қарай өлшенеді. Бәріңіз де антқа адал болып, қазақ сардары деген атаққа әрдайым лайық боласыздар деп сенемін.
Мемлекеттік рәміздер - тек мереке күндері көтерілетін атрибутика емес, бұл - елдік сана мен ұлттық бірегейліктің негізгі өзегі. Иә, қоғамда түрлі пікірлер мен реформалар жүріп жатуы мүмкін, алайда Көк Тудың астындағы ауызбіршілік пен заң үстемдігі бәрінен де жоғары тұрмақ. Геосаяси дауылдар белең алған тұста, ішкі тұрақтылық пен отаншылдық рухы мемлекет егемендігінің ең басты қорғаны болып қалмақ.
