Велоспорттан «Романдия» туры аяқталды. Бір аптаға созылған жарыста Ресей
спортшысы Ильнур Закарин жеңіске жетті. «Астана» клубының капитаны италиялық
Винченцо Нибали жалпы есепте 10-шы сатыға тұрақтады. Спорт тақырыбын Самат
Қанағатов тарқатады.
Велоспорттан Түркия туры мәресіне жетті. Ыстамбұлда өткен шешуші кезеңде
Испания спортшысы Луис Мас Боне жеңіске жетті. 124 шақырымнан тұратын жарыс
жолын «Кая Руаль» командасының өкілі 2 сағат 45 минутта бағындырды. Жеңімпазбен
бір уақыт көрсеткен Марк Кэвендиш екінші орынға орналасса, үшінші сатыны тағы
бір Испания велошабандозы Карлос Барберо еншіледі. «Астана» командасының
спортшылары шешуші кезеңді пелотонның ішінде аяқтады. Жалпы есепте Хорватия
спортшысы Кристиан Джюрасек топ жарды. Қазақстандық команданың спортшылары
жүлделі орыннан көріне алмады. Бақтияр Қожатаев 14-ші орынға тұрақтаса, Арман
Қамышев пен Руслан Тлеубаев алғашқы 50 мықтының сыртында қалды.
Футболдан Германия чемпионатының бас жүлдесін алдын ала ұтып алған
«Бавария» командасы сырт алаңда есе жіберді. 31-ші турда «Байер» клубына
қонаққа барған Хосеп Гвардиоланың шәкірттері 2-0 есебімен ұтылды. Бұл ойындағы
алғашқы голды алаң иелері үзілістен кейін соқты. Голдың авторы - Чалханоглу. Бұл
голдан кейін шабыттанған «Байер» футболшылары кездесу аяғына таман есепті
еселеді. Мергендігімен танылған Юлиан Брандт есепті қорытындылады. Бұл турдағы
келесі ойында «Хоффенхайм» командасы Дортмунд қаласының «Боруссия» клубын
қабылдап, 1-1 есебімен тең түсті. Алаң иелері сапында Фолланд жеке шеберлігімен
көзге түсіп есеп ашты.
Бірақ қуаныш көпке созылмады. Араға бір минут салып, қонақтар таразы басын
теңестірді. Әріптесінің бұрыштан көтерген добына биік секірген Хумельс баспен
тура соққы жасап, командасын жеңілістен аман алып қалды.
Самат ҚАНАҒАТОВ
