Ресейдегі Внуково
әуежайындағы қар тазалаушы көліктің жүргізушісі Владимир Мартыненко екі айға
қамауға алынды. Ол әуежайда болған ұшақ апатына кінәлі деп танылған еді. «Шешімді
Мәскеу Басман соты шығарды», - деп хабарлайды
Рейтерс агенттігі. Ресей тергеу
комитетінің қызметкерлері апат кезінде жүргізуші мас болған деп мәлімдеген. Ал
оның адвокаты болса, қорғалушысының
ішімдікті мүлдем ішпейтінін
дәлелдеп бағуда.
Внуково әуежайының диспетчерлері болса, кінәлі
деп танылған төрт азаматты босатуды талап етіп отыр. Айтуларынша,
ұшуға жауапты Роман Дунаев, әуежай
маңындағы қар тазалау жұмыстарына жауапты Владимир Леденев пен тағы екі
диспетчердің ұсталуы заңсыз. Олардың оқыс оқиғаға қатысты екендігі дәлелденген
жоқ, деп есептейді әріптестері.
Еске салсақ, 21 қазанда Внуково әуежайында
Total мұнай компаниясының президенті
Кристоф де Маржери отырған ұшақ
апатқа ұшырады. Экипаж мүшелерін қосқанда, 4 адам опат
болды.
Ләйлә ҚАЗИЯҚПАРОВА