Бүгіннен бастап
Қазақстан Ресейден жанар-жағармай мен дизель отынын тасымалдауға шектеу
енгізді. Бұл тыйым 20 сәуірге дейін созылмақ. Энергетика министрі Владимир
Школьник тиісті бұйрыққа қол қойды.
Оның орындалуын қадағалау бірінші
вице-министр Ұзақбай Қарабалинге жүктелді. Бұл жөнінде Kapital.kz жазады. Айта
кетейік, апта басында Үкімет ішкі нарықта көрші мемлекеттен жеткізілген бензин
мен дизель отыны тым артып кеткенін алға тартқан.
Энергетика вице-министрі
Мағзұм Мырзағалиев Ресейден келетін мұнай өнімдерінің шектен тыс көбеюіне жол
берілмейтінін айтты. Ол сондай-ақ, «Биыл Ресейден 1
млн 100 мың тонна бензин мен 760 мың тонна дизель отынын алуға ниеттіміз. Тек
өткен 2 айда алдағы 45 күнге жетерлік бензин сатып алынды. Шектеу мерзімі
аяқталған соң, тасымалдау қайта жанданады», - деген
болатын.
Министрлік өкілі бағаның ең өтімді бензин үшін 99 теңге көлемінде
тұрақтайтынын айтты. Ал мұнай-газ саласына талдау жасайтын мамандар «бұл
шектеудің» уақытша құбылыс екенін, бензин нарығында жағдай қалыпты, сондықтан
жүргізушілер үшін алаңдауға еш негіз жоқтығын алға тартқан.
Базаргүл ОТЫНШИЕВА
