Ауа райы -
Негізгі / Жаңалықтар / Оралдық зағиптар уақытылы жалақы төлете алмаған шенеуніктің көзін байлап тастады

Оралдық зағиптар уақытылы жалақы төлете алмаған шенеуніктің көзін байлап тастады

Үш ай бойы жарытымды жалақы ала алмай, ашуға булыққан оралдық зағиптар салаға жауапты шенеуніктің көзін байлап тастады. Олар өздерінің мүшкіл халіне атқамінерлердің назарын осылай аударуға тырысты. Мүгедектердің жеке көмекшілері былтырдан бері тиесілі жалақыларын толықтай алмағанын айтады. Бұл аздай қаңтар айында да жалақысыз қалыпты. Амалы таусылған зағиптар енді қала әкімінен заңды митинг өткізуге рұқсат беруін сұрады.

Зағиптар Орал әкімімен кездесуге тыңғылықты дайындалыпты. Алдымен бір-бірін жетелеп жүріп, түгендеп алды да, талаптары көрсетілген арызға түртінектеп қол қойды. Бірақ шенеуніктермен бірден тіл табысу оңай болмады. Ақыры жұмыспен қамту бөлімі басшысының көзін орамалмен байлап тастады.

Жеке көмекшінің қызметін 400-дей оралдық мүгедек пайдаланады. Көмекшілер - өздерінің жақын туысы немесе жұбайы. Әйтпесе көзі көрмейтін жанның қасынан күндіз-түні табылып, жетелеп жүру мүмкін емес. Мемлекет сол қызметтің әр сағатын 360 теңгеге бағалап, 3-4 сағатына ғана ақы төлейді екен. Бірақ олар сол ақшаның өзін ала алмай жүрміз дейді.

Есенғали ӨТЕГЕНОВ, І ТОП МҮГЕДЕГІ:

2018 жылы декабрь, январь, февраль, март, апрель... Бес айдың ақшасын алған жоқпыз. Солай кетті. Сотқа берді отдел занятости, бірақ срок давности наступил деп істі жауып тастады. Енді қазіргі таңда біз срок давности болар деп сотқа бердік, бірақ отдел занятости ешқандай шара қолданған жоқ.

Ашуға мінген мүгедектер жалақы мәселесін шеше алмаған жауапты шенеуніктерді соттап, жалақыны түгел төлеуді талап етті. Екі сағатқа созылған кездесуден кейін тараптар ортақ бітімге келді.

Зәуреш ШАТИКОВА, ЖЕКЕ КӨМЕКШІ:

Февраль мен марттың ішінде бізге осы қаңтардың қарызы төленетін болды. Сағаттарымызды кішкене көбейтеді. Сосын соны қалай болса да, сотқа жеткізбей төлейтін болды.

Ерлан ГАЛЕЕВ, ЖҰМЫСПЕН ҚАМТУ ЖӘНЕ ӘЛЕУМЕТТІК БАҒДАРЛАМАЛАР БӨЛІМІНІҢ БАСШЫСЫ:


Атқарылған жұмыстар актісі болады. Сол акті бойынша олар дәлелдеп шығуы керек ол кісіні жетектеп, өздерінің жасап жатқан қызметтерін дәлелдеуі керек. Содан кейін 8 сағатқа дейін төлеу мәселесі тұр. Ол енді әрбір жеке көмекшімен жеке-жеке шешілуі керек. Ол енді жалпылама емес. Әрқайсысын шақырып жеке жұмыстанатын боламыз.

Еркін КАРИН, ТІЛШІ:

Биылдан бастап, мүгедектерге қызмет көрсету жүйесі өзгертіледі. Яғни, әлеуметтік портал арқылы зағиптар өзіне ұнаған қызмет көрсетушіні өзі таңдайды. Енді мүгедектер ақпан айында рұқсат етілген митинг өткізбек ниетте. Бірақ жергілікті әкімдіктің бұған қалай қарайтыны белгісіз.

Е. Карин