Осы айдың аяғында Президент Қасым-Жомарт Тоқаевтың қатысуымен, Үкіметтің кеңейтілген жиыны өтеді. Онда өткен жылда атқарылған жұмыстары қорытындыланып, алдағы жоспарлар талқыланбақ. Бұл жайында Үкіметтің бүгінгі отырысында премьер-министр Асқар Мамин айтты. Ол өз сөзінде әлемдегі дағдарысқа, пандемияға қарамастан, ұлттық экономикамыз тұрақты деп бағалады. Уақытылы қабылданған шаралар, сын-қатерлерді еңсеруге сеп болды деді.
Асқар МАМИН, ҚР ПРЕМЬЕР-МИНИСТРІ:
Өткен жылдың қорытындысы бойынша 10 өңірде 7 негізгі көрсеткіштің бесеуі бойынша әлеуметтік-экономикалық дамудың өсуі байқалады. Бұлар – Ақмола, Ақтөбе, Алматы, Шығыс Қазақстан, Жамбыл, Қостанай, Солтүстік Қазақстан және Түркістан облыстары мен Нұр-Сұлтан және Шымкент қалалары.
Дегенмен, коронавирустан туындаған дағдарыс кезінде төл теңгеміз әлсіреді. Ұлттық банк төрағасы Ерболат Досаевтың мәлімдемесіне сенсек, 10 пайызға құнсызданған. Ал инфляция деңгейі өткен жылы 7,5 %-ды құрапты. Бағаның өсуіне әсіресе, азық-түліктің қымбаттауы әсер еткен. Ол бір жылда 11,3 пайызға шарықтады. Сондай-ақ, жалпы ішкі өнімнің өсу қарқыны да өткен жылы едәуір баяулапты.
Руслан ДӘЛЕНОВ, ҚР ҰЛТТЫҚ ЭКОНОМИКА МИНИСТРІ:
2020 жылы нақты сектор экономикалық драйвер болды. Ондағы өсу 2 пайызды құрады. Көрсетілетін қызметтер үшін өткен жылы минус 5,6%-бен аяқталды. Нәтижесінде жалпы ішкі өнімнің өсу қарқыны минус 2,6 %-ды құрады.
А. Мүтәлі
