Жамбылда жан түршігерлік жол апаты болды. Жоғары жылдамдықпен жүйткіген жеңіл көлік велосипед айдаған азаматты қағып кетті. Салдарынан 28 жастағы жігіт сол жерде көз жұмды. Бұл қайғылы жағдай көше камерасына түсіп қалған. Соққының қатты болғаны соншалық, жүргінші бағдаршам биіктігіндей жерге дейін ұшып, 40 метр қашықтыққа барып құлаған. Мерседес көлігін тізгіндеген жүргізуші қамауға алынды. Алдын ала болжам бойынша, ол көлік тізгініне мас күйінде отырған болуы мүмкін-дейді сақшылар.
Жәнібек ДАҢҚОВ, ЖАМБЫЛ ОБЛЫСТЫҚ ПД ТЕРГЕУ БАСҚАРМАСЫ БАСШЫСЫНЫҢ ОРЫНБАСАРЫ:
Қазір жүргізуші уақытша қамау изоляторына қамалды. Күдіктіге түрлі сараптама тағайындалып, тергеу амалдары жүруде. Ал, тергеудің басқа мәліметтері Қылмыстық кодекстің 201 бабына сәйкес жарияланбайды.
Б. Жұмабайұлы
