Астана тұрғындары қоғамдық көлікке 90 теңгені қимайды. Былтыр 239 мыңнан астам адам жолақы төлеуден жалтарған. Оның 9 мыңы ғана айыппұл төлепті. Ал қалғандарына- бәрібір. Автобуста тегін жүретіндермен күрес өте төмен деңгейде жүргізіледі дейді жауаптылар. Шығынның орнын толтыру үшін мүмкін кондукторларды жұмысқа қайта тарту керек шығар? Бұл орайда түрлі ұсыныс бар. Тілшіміз Асылбек Данияр тақырыпты жалғастырады.
"Зайчиктер" тек пойызда ғана емес кәдімгі қоғамдық көліктерде де көбейген. Электронды билет жүйесі бас қалада 2014 жылы енгізілсе де, халықтың еті оған әлі үйренбеген секілді.
Талғат ҚОЖАХМЕТОВ, НҰР-СҰЛТАН ҚАЛАЛЫҚ МӘСЛИХАТЫНЫҢ ДЕПУТАТЫ:
"CTS" мәліметінше, «қояндардың» кесірінен компания бюджеті жыл сайын 2 миллиард теңгені жоғалтады. Жол ақысын төлемейтіндермен күресу шарасы ретінде мен IT университетінің студенттерін қоғамдық көлікте бақылаушылар ретінде жүруді ұсындым. Олардың әзірлемелерінің көмегімен жол ақысын төлемейтіндерді анықтап, әрі қарай қудалау үшін олардың жеке басын анықтай алады.
Қаладағы қоғамдық көліктерге жауапты компания да бақылаушылардың көбейгенін құптайды. Бірақ, кондукторды қайтарудың қажеті жоқ, дейді. Айтуынша, ол - шығын. Сондықтан бақылаушылар санын арттырып және олардың құзыретін кеңейтуді ұсынады.
Науат АЗАНБАЕВА, "CTS" ЖШС ҚОҒАММЕН БАЙЛАНЫС ҚЫЗМЕТІНІҢ ЖЕТЕКШІСІ:
Бүгін 869 автобус линияға шықса әр автобусқа біз 869 полиция қоя алмаймыз ғой. Сол себепті жаңағы көлік бақылау департаментінің қызметкерлері жалақысын алып жатыр "CTS" компаниясынан. Олардың өкілеттігіне айыппұл салуға рұқсат беру керек деп санаймыз. Егер де айыппұл салмасақ ол нәтиже болмайды. Егер де кондукторларды алатын болсақ ол үлкен шығын, оларға да жалақыны төлеу керек қой.
Қала тұрғындарының да көбісі да кондуктордың болғанын қаламайды. Өйткені, автобуста олар ары-бері жүріп, адамға кедергі келтіреді, дейді. Ең оңтайлысы- карта немесе ұялы телефон арқылы төлем жасау екенін айтады.
БЛИЦ:
- Керек емес, уже үйреніп қалдық қой. Енді әркім өзі біледі.
- Меніңше, бақылаушылар керек сияқты.
- Менің ойымша, кондукторлардың болғаны дұрыс. Ақшаны қолма-қол қабылдаған ыңғайлы.
Бірақ кейбір автобус жүргізушілері кондукторларды жұмысқа алуды қолдайды.
Жолаушылардың немқұрайлығының салдарынан компания шығынға ұшырауы мүмкін. Бұл жаңа автобустардың санын көбейтуге де кедергі келтіріп отыр, дейді мамандар. Тағы бір проблема бар. Қоғамдық көлікті айдайтын жүргізуші жетіспейді. Шамамен 700 адам керек.
Науат АЗАНБАЕВА, "CTS" ЖШС ҚОҒАММЕН БАЙЛАНЫС ҚЫЗМЕТІНІҢ ЖЕТЕКШІСІ:
Қазір заңды түрде 5 жылдан көп тәжірибесі болу керек жұмыста. Ол өте жоғары талап деп ойлаймыз. Ол талапты кішкене ыңғайландыру керек. Себебі, 5 жыл деген өте көп. Қазақстанда қазір ондай жүргізуші жоқ. Сонда автобустарды сатып алғанмен, ол автобустарды кім айдайды ертең.
Қазір қалада қоғамдық көлікпен жүретін адамдардың саны едәуір артқан. Сәйкесінше, бұл автобус санының көп болуын талап етеді. Жауаптылардың сөзінше, елордаға 400 жаңа көлік керек.
А. Данияр
