Сәбидің бет-аузын тілгілеп, қан шығарды. Әлеуметтік желіде тараған видео жұрттың төбе шашын тік тұрғызды. Кейбіреулер бұл халық емі десе, енді біреулер оның анасын да, маңдайды тілген маманды да жерден алып, жерге салуда. Оқиға қайда болды? Бұл қаншалықты дұрыс? Толығырақ тілшіміз тарқатады.
Бұл бейнежазба көптің ашуын туғызды. Жаңа туған сәбидің бет-аузын тілгілегендер еш қымсынбай «Қой ауруының» бір түрі деп жазып қойған. Жұрттың бірі оны қолдаса, енді бірі «орталықты жабу керек» дейді.
БЛИЦ-САУАЛНАМА:
- Мынау несі енді? Жаңа туған сәби зауыттан жаңа шыққан машина ғой прямо!
- Жүректі зырқ еткізді ғой. Неткен қатыгездік. Сәбидің нервтері қиылып қалмай ма?
- Хиджама...Мүмкін баланың ауруы бар шығар, осы тәсілмен емдеуді қажет ететін.
Оқиға Атыраудағы хиджама орталығында болған. Бұл қалыпты жағдай дейді директоры. Айтуынша, қой ауруын қиып емдеу қазақта бұрыннан бар.
Айбат БАҚТЫҒАЛИЕВ, ХИДЖАМА ОРТАЛЫҒЫНЫҢ ДИРЕКТОРЫ:
Көбі біле білсе, ол Батыс жақта кең таралған. Бұрын балалар ауырып, омырау алмай, қатты жылап жатады. Сол кезде бір ырымдап тиынмен солай тіліп-тіліп жібереді. Бала дүниеге гепоксия деген аурумен диагнозбен дүниеге келеді. Ол баланың орысша айтқанда кислородное голодание, яғни басының клеткаларына қан жетіспей жатады. Ата-бабамыз осылай тілгілеп қан жүргізген.
Орталық директорының айтуынша, ай сайын мұнда 200-ге жуық бала келеді. Бұған дейін ешкімнен шағым түспеген. Ал дәрігерлер әлеуметтік желідегі видеоны көріп жаға ұстағандарын айтады.
Жанар ИБРАГИМОВА, ПЕДИАТР:
Гипоксия деген диагноз емес ол. Ол әртүрлі аурудың әсерінен пайда болатын гипоксия. Кислородтың жетіспеушілігі мысалы, жаңағы жетіспей туылған балаларда тағы да пневмания кездесетін состояние деп айтсам болады. Қан шығару деген ем жоқ. Балаларға мүлдем болмайды. Категорический нету такого. ВОЗ-да ол қолданбайды.
Денсаулық сақтау министрлігі бұл жағдайдың назарға алынғанын хабарлады.
Ажар ҒИНИЯТ, ҚР ДЕНСАУЛЫҚ САҚТАУ МИНИСТРІ:
Дәстүрлі емес медицинамен айналысатындардың лицензиясы болуы керек. Ал хиджама лицензияланған медицина қызметіне жатпайды. Сол себепті аталған факт бойынша комитет тергеу жүргізетін болады. Алдағы уақытта мәселені тереңірек қарастырамыз.
Облыстық полиция департаменті де бұған қатысты тексеріс жүргізуде.
Ә. Дүкембаева
