«Ай қабақ, алтын кірпік» жасау - тілегім. Бүгінде қыз-келіншектер арасында кірпік жабыстыру сәнге айналған. Трендтен қалмаудың әлегі әйтеуір. «Көрік беріп тұрады» деп найзадай кірпік жабыстырып, ұсқынсыз күйге түскен көрермен редакциямызға хабарласты. Басынан өткені өзгелерге сабақ болсын дейді.
Елордалық Жанель сұлу боламын деп сан соғып қалды. Жарнамасы жер жарған сұлулық салонына жасанды кірпік жасатқан. Алайда көзімнен айырылып қала жаздадым дейді.
Жанель, ҚАЛА ТҰРҒЫНЫ:
Үйге келіп, көзімнің қызарғанын аңғардым. Күнге көп жүре алмайтынмын, көзімнің жасы ағып, көптеген қиыншылықтар болды. Окулистқа сол дер кезінде хабарластым. Көріп отырғандарыңыздай мына жерде кератит деген ауруға шалдыққанмын.
Ал тұрғындардың пікірі әралуан.
БЛИЦ-САУАЛНАМА
- Жақсы, жасатамыз. Бір жерге барғанда, қонаққа, тойға сонда жасаймыз.
- Негізі жаман көзқарасым. Бірақ мен алғаш рет істеткенмін. Бұдан кейін істеткім келмейді. Аллерготестті ештеңе айтқан жоқ, ескертпеді ондай.
- Арзанға қарағанда қымбатқа жасатқан жақсы. Качественно сеніп отырасыз. Арзанға жасатсаңыз ертең көзіңізге бірнәрсе болса да, дәлелдей алмайсыз оны. Өйткені олардың сертификаттары болмауы мүмкін, салондары болмайды, көбіне үйінде жасайды.
- Қазір қаншама қыздар жабырқап жатыр ғой. Сол кірпіктен қаншама операция болып жатыр. Мен вообще қарсымын.
Дәрігерлер де мұндай жағдайдың жиі болатынын айтады. Себебі, тәжірибесі аз маман көп. Көп нәрсені олар ескере бермейді дейді.
Жәмила ИСАХАНОВА, ЖОҒАРЫ САНАТТЫ ДӘРІГЕР, МЕДИЦИНА ҒЫЛЫМДАРЫНЫҢ КАНДИДАТЫ:
Процедураға жазылмас бұрын, желімге аллергиялық реакция бар-жоғын, яғни теріні желімге тексеріп көру керек. Алдын ала аллерготест өткенді дұрыс.
Мұны білікті, тәжірибелі кірпік ұзарту маманы да қостайды. Қазір көп салонда аллергияға қарсы реакция тексерілмейтінін айтады. Себебі, жас мамандар қолын жаттықтыру үшін қыздарға арзан қызмет ұсынады.
Томирис БАЛТАБАЕВА, КІРПІК ҰЗАРТУ ШЕБЕРІ:
Мен мысалы өзім клиентті екі күн бұрын аллергиясын тексеру үшін клиентті шақырамын, пробныйға. Модель сияқты шақырса клиентті, тек қана мұғаліммен, үйреткен мұғалімімен болу керек.
Дәрігерлердің айтуынша, лицензияланбаған материалдың елімізде қолданылуына рұқсат етілген. Алайда қауіпсіздік ережелері қатаң сақталуы керек.
Жәмила ИСАХАНОВА, ЖОҒАРЫ САНАТТЫ ДӘРІГЕР, МЕДИЦИНА ҒЫЛЫМДАРЫНЫҢ КАНДИДАТЫ:
Материалдың ішінде өзге елдер қолданысқа шектеу қойған формальдегит канцерогені де бар. Оны шамадан артық қолдану конъюнктивит, кератит сынды ауруларға алып келеді.
Мамандар өз ісіне жауапты шеберлерге ғана жүгінуге кеңес береді. Ал кейіпкеріміз Жанель сәтсіз тәжірибеден кейін бұл процедурадан мүлдем бас тартты.
