Жергілікті есірткі бастығының кесірінен күйеуінен айырылған колумбиялық әйел оның өлімі үшін кек алды. Әйел қауіпті қылмыскерді азғырып, оны полицияға тапсырған, деп хабарлайды Stan.kz ақпарат агенттігі.
Сьенага-де-Орода тұратын Рубен Дарио Вилория Барриос өзін адал кәсіпкер ретінде танытқан. Оны білетіндердің көпшілігі ер адамды парасатты адам деп сипаттайды. Ал шындығында, Барриос екі түрлі өмір сүрген: ол Clan del Golfo қылмыстық тобын басқарған және қылмыстық ортада Хуанчо ретінде танымал болған.
Барриос басқа елдерге, соның ішінде Америка Құрама Штаттарына үлкен мөлшерде есірткі тасымалдаған, бәсекелестері мен бұрынғы серіктестерін өлтірген, сонымен қатар қару-жарақ пен оқ-дәрілердің заңсыз тасымалдаумен айналысты.
Хуанчо өте сақ болып, қылмыстық әрекеттерге өзі ашық түрде қатыспады. Ол 2020 жылы қылмыстық топпен байланысы бар деген күдікке ілінді: содан кейін алғаш рет қамауға алынды, бірақ полиция оның кінәсін дәлелдей алмады.
Осыдан кейін ол радардан жоғалып кетті, тіпті электрондық пошта мен әлеуметтік желілерді пайдалануды тоқтатты.
Хуанчо өлтіруді бұйырған адамдардың бірінің әйелі оның шынайы кәсіптері туралы білетін. Әйел Хуанчоның әлеуметтік ортасына еніп, есірткі сатушыны бірте-бірте өзіне ғашық етті. Көп ұзамай Барриос оған сеніп, өзінің қылмыстық империясын басқару туралы мәліметтермен бөлісе бастады.
Барриостың көңілдесі бола тұра, әйел полицияға үш ай бойы Clan del golfo қызметі және Хуанчоның топты басқарудағы рөлі туралы ақпарат жіберді. Бұл Барриосқа қарсы қылмыстық іс қозғауға мүмкіндік берді.
Әйел Хуанчоны қамауға алуды ұйымдастыруға да көмектесіп, билікке оның банданың басқа мүшелерімен қай жерде және қай уақытта кездесетінін айтты. Барриос арнайы күштер мен ұлттық полицияның қатысуымен "Корона" операциясында қамауға алынды және қазір сотты күтіп жатыр.
Барриос алтыдан астам адамды өлтіруді ұйымдастырды деген күдікке ілінген, оның екеуі – полиция қызметкері. Алынған мәліметтерге сәйкес, ол ай сайын бір жарым тоннадан астам кокаинді шетелге тасымалдаған. Есірткі заңсыз айналымын ұйымдастырғаны үшін прокурор оны 22 жылға бас бостандығынан айыруды сұраған.
