Ақтөбелік құқық қорғаушылар жол-көлік оқиғаларынан зардап шеккен науқастар үшін қан тапсырды. Шараға Полиция департаментінің жеке құрамы мен бөлімшелерден 100-ге жуық қызметкер қатысты. Бұл туралы Қазақстан телеарнасы хабарлайды.
Олардың көбі бұған дейін де донор болып жүргендер. Қан орталығының мамандары Полиция департаментімен тығыз байланыс орнатқан. Мұндай шаралар жыл сайын өткізіліп келеді. Құқық қорғаушылар арасында өз еркімен барып, қан тапсырып тұратындар да бар. Дәрігерлердің айтуынша, өңірде тұрақты донорлар саны мыңға жуық. Олардың әрқайсысы жылына 20 адамды ажалдан арашалауға көмектеседі.
Абай Жүсіпов, облыстық полиция департаментінің бастығы:
Менің әріптесім өкінішке орай қызмет бабында қаза тапты. Сол кезде де қан тапсыру керек болды. Бүкіл департамент қызметкерлері келіп, қан тапсырдық. Сондай іс-шараларға да қатысамыз. Осыған өзіміз үлгі болайық деп өзім де қатысып отырмын бүгінгі шараға.
