Міндетті
медициналық сақтандыру жүйесіне енудің басты талабы - тұрғылықты мекенжай
бойынша емханаға тіркелу. Сондай-ақ, әр азаматтың өз статусын анықтап алуы.
Осыған орай Павлодар өңірінде арнайы ақпараттық-түсіндіру жұмыстары қолға
алынған.
«Нұр Отан» партиясының облыстық филиалы жанындағы «Мемлекеттік қызмет
көрсету» бағыты бойынша құрылған комиссияның кезекті отырысында бұл мәселе
жан-жақты талқыланды. Шараға денсаулық сақтау саласының мамандары, қоғамдық
ұйым өкілдері, партия мүшелері мен депутаттар қатысты. Елімізде биылғы жылдың 1
шілдесінен медициналық сақтандыру жүйесі жұмыс істей бастайды. Жұмыс берушілер
аталған қорға қарамағындағы әр жұмысшы еңбекақысының 1 пайызын төлейтін болады.
Бұл жеке кәсіпкерлерге де қатысты. Олардың аударатын жарнасы ең төменгі жалақы
мөлшерінің 5 пайызы деп белгіленген. Айта кетері, әлеуметтік санатқа жататын 15
топқа жарнаны үкімет төлемек. Олар - балалар, көп балалы аналар, әскери
қызметкерлер, студенттер, мүмкіндігі шектеулі жандар және зейнеткерлер. Адамның
өміріне тікелей байланысты болғандықтан, медициналық сақтандыру жүйесінің
маңыздылығын әр тұрғынға жеткізу - басты міндет. Сондықтан жергілікті жерлерде
түсіндіру шаралары күшейтіле түскен.
Жұлдыз
Тәйкебаева, «Нұр Отан» партиясы Павлодар
облыстық филиалы төрағасының орынбасары:
Отырыста
денсаулық саласындағы ең маңызды сұрақтар қарастырылды. Біріншіден, ол -
міндетті медициналық сақтандыру және сандық сервистерді енгізу. Бұл денсаулық
сақтау саласының маңызды мәселесі болғандықтан, бұл сұрақтар «Нұр Отан»
партиясының тікелей бақылауында болады.