Елімізде зергерлік бұйымдар қымбаттап жатыр. Мамандар бұған алтын бағасының шарықтауы себеп дейді. Алдағы уақытта тағы көтерілуі мүмкін бе? Осы және өзге де ақпараттар "Экономика" топтамасында.
Елімізде зергерлік бұйымдар мен сағаттар күрт қымбаттады. Бағасы өткен аймен салыстырғанда шамамен 6 процентке өскен. Неке сақиналары да 6,2 пайызға көтерілді. Бұл- өткен жылдың наурыз айынан бергі ең жоғарғы көрсеткіш. Өңірлер бөлінісінде Түркістан облысы көш бастап тұр. Бірден 16,5 пайызға қымбаттаған. Қызылордада да әшекей бұйымдар ақысы шарықтаған.
Қаржысын депозитте сақтайтындардың саны ай сайын азайып келеді. Көпшілік тапқан-таянғанына бағалы қағаздар сатып алатын болған. Мұндай отандастарымыздың саны 7,6 процентке өсті. Жылжымайтын мүлікке инвестиция салуға да сұраныс артты. Халықтың 28 проценті тұрғын үйге қаржы құйған. Сондай-ақ, теңгесін қолма-қол жинайтындар да көбейді. Олардың үлесі осыдан екі жыл бұрын 26 пайыз болса, қазір 41 процент.
Бұрынғыдай базар аралап, азық-түлік сатып алуды қойдық. Онлайн платформалардан тапсырыс береміз. Курьерлер таңдағаныңды табалдырығыңа дейін жеткізеді. Табаныңды тоздырмайсың. Сәйкесінше, курьерлердің табысы артуда. Астана мен Алматыда жеткізу қызметімен айналысатындар айына 500 мыңға дейін табады. НeadHunter порталы осындай статистика жасады. Мамандар қызмет құнының өсуін кадр тапшылығымен байланыстырады.
Отандастарымыз бір жылда орта есеппен 29 келі жеміс жейді. Қала тұрғындары 31, ал ауылдағы ағайын 25 келі тұтыныпты. Өңірлер бөлінісінде Астана қаласы алғашқы орында. Әрбір елордалық шамамен 37 килограмм жеміс жеген. Қызылорда мен Жамбыл облыстары үздік үштікте. Маңғыстау мен Абай облыстары жемістерді аз тұтыныпты.
Валюта бағамына тоқталайық. Қор нарығында доллар бүгін 523 теңгеден саудалануда. Еуро 543, Ресей рублі 4,92 теңге болды.
