"Ақтауда орын алған қайғылы оқиғадан сабақ алу керек". Үкімет басшысы жауапты ведомстваға апат қайта орын алмас үшін нақты ұсыныстар әзірлеп, дұрыс қорытынды шығаруды тапсырды. Енді елдегі әуе кемелерінің техникалық жай-күйі бақылауға алынады. Сондай-ақ, Премьер-Министр жергілікті атқарушы органдарға Әуежайларға жақын маңдағы қоқыс орындарын жоюды жүктеді. Толығырақ Сүндет Оралбек тарқатсын.
Мемлекет басшысының тапсырмасы бойынша зардап шеккендерге толық көлемде медициналық көмек көрсетіліп, қаза тапқандардың туыстары мен жақындарына қажетті қолдау шаралары жүргізілуде. Бұл жұмыстар әкімдікке жүктелген. Сондай-ақ, қазір жедел желі жұмыс істеп тұр, оған мыңнан астам қоңырау түсті. Үкімет басшысы болған оқиғадан сабақ алу керегін айтты.
СОЛЖАС БЕКТЕНОВ, ҚР ПРЕМЬЕР-МИНИСТРІ:
Бұл қайғылы жағдай бізге де ұшу қауіпсіздігі бойынша тиісті шараларды қабылдау керектігін білдіреді. Бірінші кезекте жоспардан тыс тексеріс жүргізу және әуежайлардың, әуе кемелерінің техникалық жағдайын ерекше бақылауға алу қажет. Сондай-ақ, әуе оқиғаларына жедел ден қою мақсатында апаттық жұмыстарын жетілдіру және мүдделі мемлекеттік органдардың үйлесімді жұмысын қамтамасыз ету қажет. Жергілікті атқарушы органдарға әуежайларға жақын маңдағы стихиялық қоқыс алаңдарын жою бойынша шаралар қабылдауды тапсырамын.
Ертең елге Бразилияның авиациялық билігі мен Embraer 190 компаниясының өкілдері келеді. Бұл туралы Қанат Бозымбаев Премьер-Министрге комиссияның жұмысы туралы есебінде айтты. Қазір Түпқараған ауданында жергілікті техногендік сипаттағы төтенше жағдай режимі жарияланған. Өңірде Ұлттық шұғыл медицина орталығының, төтенше жағдайлар министрлігінің өкілдері, сондай-ақ, Ресей федерациясының құтқарушылары мен Әзербайжан Республикасының санитарлық авиация бригадасы жұмыс істеп жатыр.
ҚАНАТ БОЗЫМБАЕВ, ҚР ПРЕМЬЕР-МИНИСТРІНІҢ ОРЫНБАСАРЫ:
Төтенше жағдай кезінде жеке құрамның 462 қызметкері, 102 техника мен 2 әуе кемесі жұмылдырылды. Құтқару барысында 29 адам ауруханаға жатқызылды. Оның екеуі кәмелет жасқа толмаған. Жеке басын анықтау мақсатында 38 дене мәйітханаға жеткізілді. Толық ем алып болған Ресейдің 9 азаматы таңертең дәрігерлердің бақылауымен елдеріне қайтты.
Сондай-ақ, Үкімет басшысы Әзербайжанның Астанадағы елшілігіне барып, көңіл айту кітабына жазба қалдырды. Орны толмас ауыр қайғыға ортақтасып, апат салдарынан зардап шеккендердің тезірек сауығып кетуін және Әзербайжан халқына сабыр мен төзімділік тілейтінін жеткізді.
