Мемлекеттік қызметкерлердің орташа жалақысы 508 мың теңгеге жетті. Ал қаржы, сақтандыру саласы мамандарының айлығы миллион теңгеге жуықтайды. Табысын алтынмен сақтайтындардың айы оңынан туды. Себебі, бағалы металл қымбаттап жатыр. Осы және өзге де ақпараттар "Экономика" топтамасында.
Қайырлы кеш! Эфирде "Экономика". Студияда мен Сүндет Оралбек.
Орташа жалақы тағы да өсті. Үкіметке жұмыс істейтіндердің табысы 508 мың теңге болса, жеке меншікте нәпақасын тауып жүргендер 424 мың айлық алады екен. Бірақ көпшілік бұл сандардың шындыққа жанаспайтынын айтады. Халықтың қолына алған ақшасы мен статистика бюросының мәліметі арасында жер мен көктей айырмашылық бар. Ал Freedom Life жүргізген зерттеу бойынша орта білімді қызметкер 262 мың, жоғары оқу орнын бітіргендер 436 мың теңге жалақы алады. Ең жоғары айлық қаржы қызметі мен сақтандыру саласының мамандарына беріледі. Шамамен 1 млн теңге. Компьютерлік бағдарламалау, су, теңіз, әуе қызметкерлері – айына 800 мың табыс табатын көрінеді.
Қаржысын алтынмен ұстайтындар мол пайдаға кенелуде. Себебі, бағалы метал бағасы аспандап жатыр. Нью-Йорктің Comex биржасында фьючерсі 13,21 долларға жетті. Осылайша, бір трой унциясы 3163 доллардан саудаланып жатыр. Айта кетейік, алтын қатарынан 4 рет қымбаттады. Күміс құны да көтерілді. Унциясы 34 доллардан асты. Метал бағаларының қарқынды өсуіне сарапшылар геосаяси тұрақсыздық, валюталық ауытқулар мен банк секторындағы тұрақсыздық себеп деп отыр.
Енді көше бойындағы немесе ғимарттардың қасбеттеріндегі валюта бағамдары көрсетілген баннерлер алынып тасталады. Ұлттық банк ақша айырбастау қағидаларына өзгеріс енгізбек. Жауаптылар стендтер жол қозғалысына кедергі келтіреді дейді. Енді шетел валютасын сату және сатып алу бағамдары туралы ақпарат тек айырбастау пунктерінің ішіне орналастырылады.
Мендегі бар ақпарат осы. Келесі кездескенше аман-сау болыңыздар!
