Абай облысында жыл басынан бері жолдағы жүргізушілердің қарсы бағытқа шығуының 55 дерегі тоқтатылды.
Абай облысында жол қозғалысы қауіпсіздігіне бақылау күшейтілуде. Қарсы бағытқа шығу - жол қозғалысы ережелерін өрескел бұзудың ең қауіпті түрлерінің бірі. Мұндай әрекет көбіне ауыр салдарға әкелетін жол-көлік оқиғаларының негізгі себептерінің бірі болып саналады. Себебі қарсы келе жатқан көлікпен соқтығысу қаупі бірнеше есе артып, жүргізушінің әрекет ету уақыты күрт қысқарады. Жыл басынан бері өңірде қарсы бағытқа шығудың 55 дерегі анықталып, жолы кесілді. Әрбір құқық бұзушылық бойынша полиция қызметкерлері жүргізушілермен профилактикалық және түсіндіру жұмыстарын жүргізді. Сонымен қатар бірқатар жол қозғалысы ережесін бұзу фактілері дрондардың көмегімен тіркелген.
Патрульдік полиция қызметкерлерінің тәулік бойғы жұмысының нәтижесінде жолдағы құқық бұзушылықтар жедел тоқтатылып, қауіптің алдын алу шаралары күшейтілді. Полиция қызметкерлерінің айтуынша, жол - тек қозғалыс кеңістігі ғана емес, әр адамның жауапкершілігін талап ететін орта. Осыған байланысты Абай облысы полиция департаментінің патрульдік полиция ротасы профилактикалық және жедел бағыттағы жұмыстарды тұрақты түрде жүргізуде. Абай облысы ПД патрульдік полиция ротасының командирі Айдын Кантарбаев бұл бағыттағы жұмыстың маңызын атап өтті.
- Қарсы бағытқа шығу - жай ғана ереже бұзу емес, бұл өз өміріңді де, өзгенің өмірін де қауіпке тігу. Біз әрбір деректі тіркеп қана қоймай, оның алдын алуға басымдық береміз. Жолдағы тәртіп - қорқыту емес, бұл мәдениет. Ал мәдениет әр жүргізушінің өзінен басталады, - деді ол.
Тәртіп сақшыларының айтуынша, әрбір рейд - тек тексеріс емес, ықтимал қайғылы жағдайдың алдын алу шарасы. Қарсы бағытқа шығу секілді өрескел құқық бұзушылықтар алдағы уақытта да қатаң бақылауда болып, профилактикалық жұмыстардың негізгі бағыты ретінде жалғасын табады.
