Қазақстандық танымал блогер әрі спортшы Айтым Жақыпов Астанада жол қозғалысы ережелерін бұзғаны үшін әкімшілік жауапқа тартылды.
Әлеуметтік желіде бұған дейін Mercedes-Benz көлігінің жүргізушісі бірнеше жол ережесін қатар бұзғаны түсірілген видео тараған. Жазба авторының айтуынша, оқиға Астанадағы Қарқаралы тасжолында, LRT желісі бойында болған.
Видеода жүргізуші жол жиегімен жүрген, жол белгілерінің талабын елемеген. Бұдан қалды, бұрылыс шамын қоспай маневр жасаған, апатты жағдай туғызған, қарсы бағыттағы жолаққа шыққан.
Желі қолданушылары көліктің мемлекеттік нөмірі арқылы жүргізушінің Айтым Жақыпов екенін анықтаған. Кейін блогер көлікті өзі басқарғанын растады және көпшіліктен кешірім сұрады.
"Расымен қатты асықтым. Егер біреуге қолайсыздық тудырсам, шын жүректен кешірім сұраймын", – деп жазды ол.
Оқиға әлеуметтік желіде қызу талқыланды. Бірі блогерді жүргізуші куәлігінен айыруды ұсынса, енді бірі оның спортшы екенін ескеріп, әзіл ретінде "200 берпи жасауды" жаза ретінде ұсынған.
Астана қалалық полициясы әлеуметтік желідегі бейнежазбаға мониторинг жүргізіп, жүргізушінің жеке басын анықтағанын хабарлады.
Полиция мәліметінше, 34 жастағы жүргізуші жол белгілерінің талаптарын сақтамағаны, қарсы бағытта жүру ережесін бұзғаны және маневр жасау қағидаларын сақтамағаны үшін әкімшілік жауапкершілікке тартылған.
Айтым Жақыпов Қазақстандағы танымал блогер әрі спортшы. Оның Instagram парақшасына 3,9 миллион адам жазылған. Ол воркауттан рекордтарымен, пауэрлифтингтегі жетістіктерімен және артық салмағы бар адамдарға арналған жобаларымен кеңінен танылған.
