Ауа райы -
×
Негізгі / Жаңалықтар / Қызылордада 8 жастағы бала көпірден құлап, суға батып кетті

Қызылордада 8 жастағы бала көпірден құлап, суға батып кетті

Қызылордада 8 жастағы бала суға кетті. Ол канал үстіне салынған көпірден өтіп бара жатып, құлаған. Балақайдың денесі табылмай жатыр.  Ал су шаруашылығынң мамандары бұл өткел жаяу жүргіншілерге арналмаған дейді. Өңірден-Мөлдір Тоқтасынқызы.

Ернар күні кеше екінші сыныпты тәмамдаған. Үйіне бара жатқанда суға түсіп кеткен.  Әбден тозығы жеткен көпірдің ортасы тесік болған, сол жерге құлаған балақай   қайта шыға алмаған.

Байқадам су торабының арғы бетінде он шақты үй бар. Олар ертеректе су шаруашылығы мамандарына қызметтік баспана ретінде берілген. Тұрғындар ауыз суды каналдың келесі бетінен тасып ішетіндіктерін айтады. Осы жалғызаяқ көпірмен төтелеп қатынайтын көрінеді. Бірақ мамандар бұл өткел жаяу жүргіншілердің жүруіне  тыйым салынған дейді.

Жорабек НҰРЫМБЕТОВ, "ҚЫЗЫЛОРДАСУШАР" ӨНДІРІСТІК УЧАСКЕСІНІҢ БАСТЫҒЫ:


Ол жолаушы өтетін көпір емес, су өлшегіш мостик, көпірше. Гидромостиктің кейбір жерлері сварка болған соң кетуі мүмкін. Оған ағымдағы жөндеу жасауымыз мүмкін. Бірақ оны жан-жағын қоршап қоюға құқығымыз да жоқ, қоршай да алмаймыз. Ал бірақ негізі суды өлшеп тұруға салынған прибор.


Қазір 8 жастағы балақайды іздестіру жұмыстары қарқынды жүргізуде. Еріктілер жағалауларды қайта қайта шолып шықса, құтқарушылар  күндіз-түні суды сүзіп жатыр. Әзірге нәтиже болмай тұр.

Нұрсұлтан ИБРАГИМОВ, ҚЫЗЫЛОРДА ОБЛЫСТЫҚ ТЖД ЖӘНЕ АВАРИЯЛЫҚ ҚҰТҚАРУ ЖҰМЫСТАРЫ ҚЫЗМЕТІНІҢ БАСТЫҒЫ:

Таңғы сағат 5:40-тан бастап іздестіру жұмыстары қайта жалғасты.  Қызылорда облыстық ТЖД-нен 67 қызметкер 7 бірлік техника, 3 маторлы қайық, екі кинологиялық қызмет, үш бірлік сүңгуірлер жұмылдырылуда. Іздестіру 5 бағытта жүргізіліп жатыр.

Мамандар биыл балалардың суға кету жағдайының  көп екенін  айтып, дабыл қағуда. Жыл басынан бері 13 адам суға кетсе, оның 8-і бала.

М. Тоқтасынқызы