Қазақтың тұңғыш ғарышкері, Халық қаһарманы Тоқтар Әубәкіров атындағы дәрісхана ашылды. Енді Сәкен Сейфуллин атындағы Қазақ агротехникалық универсиетінің студенттері осында дәріс алады. Жеке кәсіпкерлердің қолдауымен оқу кабинеті ғарыштық дизайнда жасалған. Шара аясында Тоқтар Әубәкіровтің балалық шағынан бүгінге дейінгі өмір жолынан көрме ұйымдастырылды. Онда эксклюзивті фотолары, ғарышқа ұшу алдындағы түпнұсқадағы дулығасы, скафандр-костюмі қойылған. Оқу кабинетінің ашылуына Халық қаһарманы, ғарышкер Айдын Айымбетов, Қазақстан Республикасы Парламенті Мәжілісінің депутаттары мен студент-жастар арнайы қатысты. Сондай-ақ, тұңғыш ғарышкер шара барысында алғашқы қадамын жасаған баланың тұсауын кесіп, батасын берді.
Саясат НҰРБЕК, ҚР ҒЫЛЫМ ЖӘНЕ ЖОҒАРЫ БІЛІМ МИНИСТРІ:
Біздің ең үлкен үмітіміз осы залдың арқасында Тоқтар ағамыздың арманымен Жаңа Қазақстанның жастары тәрбиеленеді. Үлкен арманмен. Өзіміздің күнделікті материалдық нәрселермен шектелмеген. Бұл жастар алла жазса, сіздің өзіңіздің беріп кеткен батаңызбен жаңа ғылыми жаңалықтарды ашуға бет бұратын шығар.
Р. Бақытжанқызы
