Көне әрі мәңгі жас Самарқанд Қазақстан Республикасының Президенті жоғары мәртебелі Қасым-Жомарт Тоқаевты қарсы алады. «Орталық Азия – Еуропа одағы» саммитіне қатысу үшін Өзбекстанға ат басын бұрған Мемлекет басшысына осылай ыстық ықылас білдірді. Әуежайдан елдің Премьер-министрі Абдулла Арипов күтіп алды.
Мемлекет басшысы Шығыстың жауһары атанған киелі мекенге табаны тиісімен Еуропалық кеңес Президенті Антониу Коштамен кездесті. Бүгінде бұл ұйым еліміздің ірі сауда серіктесі, әрі инвесторы. Шетелден тартылған қаржының 40 пайызы дәл осы одаққа тиесілі. Былтыр Қазақстан мен бірлестікке мүше елдер арасындағы тауар айналым 50 млрд долларға жуықтады. Президенттер екі жақты серіктестікті одан әрі нығайту мәселелерін қарастырды. Артынша Мемлекет басшысы Еуропалық комиссия Президенті Урсула фон дер Ляймен кездесті. Тараптар өңірлік және халықаралық күн тәртібіндегі өзекті мәселелер жөнінде пікір алмасты. С5+Еуропа одағы аясындағы жұмысты жалғастыруға уағдаласты.
