Шайбалы хоккейден Қазақстанның ұлттық құрамасы элиталық дивизионға жолдама
алды. Әлем чемпионатының кезекті турында Польша командасымен сынға түскен
Андрей Назаровтың шәкірттері 3-2 есебімен жеңіске жетті. Тақырыпты Самат
Қанағатов толықтырады.
Әлем чемпионатында бір кездесу қалғанына қарамастан, Қазақстанның ұлттық
құрамасы қатарынан төрт ойында үздік шығып, уақытынан бұрын элиталық дивизионға
жолдама алды. Шешуші кездесуде Андрей Назаровтың шәкірттері Польша командасын
3-2 есебімен ұтты. Бұл ойындағы алғашқы шайбаны Роман Савченко соқты. Қарымта
шабуылға шыққан айдын иелері Бартоломью Почиханың көмегімен есепті теңестірді.
Десе де, үзіліске дейін тағы бір сәтті шабуыл ұйымдастырған қазақстандық ұжым
есепті еселеді. Бұл сәтте Роман Старченко мүлт кетпеді. Үшінші кезеңнің басында
намысқа тырысқан Польша хоккейшілері есепті тағы да теңестірді. Бұл жолы жеке
шеберлігімен көзге түскен Марцин Колуш жанкүйерлер қошеметіне бөленді. Бірақ айдын иелерінің қуанышы көпке созылмады. Кездесу аяғына қарай дубльдің авторы
атанған Роман Старченко командасына жеңіс сыйлады. Әлем чемпионатындағы соңғы
кездесуін Андрей Назаровтың шәкірттері Италия құрамасына қарсы өткізеді.
Жыл сайын халықаралық ауыр атлетика федерациясы әлемнің үздік спортшыларын
анықтайды. Дауыс беру кезінде 46 мемлекеттің жанкүйерлері бір ауыздан екі
дүркін олимпиада чемпионы қазақстандық Илья Ильин мен ресейлік Татьяна
Каширинаны 2014 жылдың үздік спортшылары деп таныды. Қызылордалық атлет өзі
қатысқан барлық жарыстарда тек бірінші орыннан көрінді. Алматы қаласында өткен
әлем біріншілігінде салмақ ауыстырғанына қарамастан, Илья Ильин төрт дүркін әлем
чемпионы ғана болып қоймай, әлем рекордын жаңартты. Аталған спортшыларды
марапаттау салтанаты Астанада өтті.
Еске салайық, Алматы қаласында өткен әлем
чемпионатында Қазақстан құрамасы 3 алтын және 2 күміс мелдальді ұтып алып,
командалық есепте үшінші орынға тұрақтады.
Самат ҚАНАҒАТОВ
