Негізгі / Жаңалықтар / Қарағанды мектептеріне бала қабылдау электронды жүйе арқылы жүргізіледі

Қарағанды мектептеріне бала қабылдау электронды жүйе арқылы жүргізіледі

Жемқорлыққа жол жоқ! Қарағанды мектептері парақорлықты болдырмау үшін электронды жүйеге көшті. Енді білім ордасына келетін балалар автоматты түрде қабылданатын болды. Өйткені, ата-аналар арасында мектеп, сынып, одан қалса мұғалім таңдайтындар көбейген. Қалалық білім бөлімі жаңа жүйені бүгін мектеп басшыларына таныстырды. Ол маусымның бірінен бастап толық іске қосылады. Ата-аналар тамыздың 30-на дейін балаларын электронды парақшада тіркеп, мектепке қабылдау туралы өтініштерін жолдай алады. Ол үшін арызы мен баланың денсаулық паспорты, сондай-ақ, фотосуретінің сканерленген нұсқасы жеткілікті. Ал баласын тұрғылықты мекен-жайынан өзге мектепке бергісі келетіндер таңдаған мекемелерінде квота немесе кезекке тұру арқылы қабылданбақ. Оқушының қабылданғаны немесе қабылданбағаны туралы ақпарат ана-ананың телефон нөміріне жолданады.  

Наталья ГОЛОВИНА, ҚАРАҒАНДЫ ҚАЛАЛЫҚ БІЛІМ БӨЛІМІ ЖАЛПЫ ЖӘНЕ ОРТА БІЛІМ БЕРУ СЕКТОРЫНЫҢ МЕҢГЕРУШІСІ: 

Мекемеге келіп, директорды тосудың қажеті жоқ. Оның үстіне балаларын тіркелген мекен-жайынан басқа гимназия, лицейлерге бергісі келетін ата- аналар бар. Ондай мектептер толып кетуі мүмкін, сондықтан балалар ең алдымен тұрғылықты мекен-жайы бойынша қабылданады. Содан кейін басқа жақтан келген ата-аналардың өтініші қаралады.

А. Қуаш