Түркістан облысында қашықтықтан оқыту үшін ноутбуктер жеткізу кезінде 2,5 млрд теңгеден астам қаржы жымқырылған. Бұл деректі Қаржы мониторингі агенттігінің өкілдері анықтады.
Агенттіктің мәліметінше, аймақтың білім мекемелеріне 21 мың ноутбук сатып алу көзделген. Осы мақсатта Түркістан облыстық Адами әлеуетті дамыту басқармасы «МТ-Сервис» серіктестігімен 3,4 миллиард теңгеге келісім жасаған. Алайда, 2,5 млрдтан астам теңгеге алынған тауар тапсырыс берушінің техникалық ерекшеліктеріне сәйкес келмеген көрінеді. Қазір бюджет қаражатын жымқыру дерегі бойынша аталған серіктестік басшысы мен облыс әкімдігінің Адами әлеуетті дамыту басқармасының лауазымды тұлғаларына қатысты қылмыстық іс тергеліп жатыр.
А. Төребекқызы
